मानव बेचविखन नियन्त्रण अभियान कार्यक्रम

पहुरा समाचरदाता
धनगढी,१६ बैशाख । मानव बेचविखन तथा ओसारपसार नियन्त्रण सम्बन्धी अभियान कार्यक्रम धनगढीमे हुइल बा ।

महिला बालबालिका तथा जेष्ठ नागरिक मन्त्रालयके आयोजनामे हुइल कार्यक्रममे धनगढी उपमहानगरपालिकाके नगर उपप्रमुख कन्दकलाकुमारी राना भौतिक विकाससंगे मानवीय ओ स्वास्थ्य शिक्षाके विकास हुइना जरुरी रहल बटैली ।
अब्बे मानव बेचविखन तथा ओसारपसार कैना तौरतरिकामे परिवर्तन हुइल बा ,’ नगर उपप्रमुख राना कहली,‘गरिबीके कारण टमान मेरिक प्रलोभनमे परके महिला बैदेशिक रोजगारीमे जैठै । ढेर जैसिन महिला उहेसे बेचविखनमे परठै । गैर कानूनीरुपसे भारतिय डगर हुके जैना महिला ढेर जोखिमे परठै ।’

उहाँ कहली, ‘हिंसामे परल महिला अपन बाट धारे नइसेक्ठै । ठाउँके ठाउँ अपन बाट धारे नइसेक्नाफे गरिबी हो । धनगढी उपमहानगरपालिका महिलाहुकनके आर्थिक सशक्तीकारणके लाग टमान मेरिक सीपमुलक आयमुलक तालिम संचालन करले बा ।’ धनगढी उपमहानगरपालिकासे शिक्षामे सुधारके प्रयास सुरुस् करलफे नगर उपप्रमुख राना बटैली ।

कैलालीके प्रमुख जिल्ला अधिकारी युवराज कट्टेल मानव बेचविखन तथा ओसारपसार नियन्त्रण कैना वडासे लेके पालिका ओ प्रदेश सयन्त्र सजग हुइना जरुरी रहल बटैलै । मानव बेचविखन तथा ओसारपसार हुइना जोगैना परिवारके सदस्य का करटै । कैसिक अवस्थाममे बटै । ओकर आनीबानीबारे सक्कु जाने चसो लेहे पर्ना उहाँ बटैलै ।

मानव बेचविखनके घटनासे अब्बे लागु औषध दुव्र्यशनीके समस्या जटिल बन्टी गैल बा,’ प्रजिअ कट्टेल कहलै, ‘पढन बेला, पैसा कमके परिवारहे डेना अवस्थामे यूवाहुक्रे दुव्र्यसनमे फसेबर उल्टे परिवारसे ओइन उप्पर खर्च करे परल बा । हम्रे ढेर बेहोसी बटी, जब समस्या परसेकठ तबकेल ओकर पाछे दौरठी ।’ लागु औषध दुव्र्यवसनके कुलटमे यूवासंगे यूवतीफे फसल प्रजिअ बटैलै ।

प्रहरी निरिक्षक सरस्वती अधिकारी मानव वेचविखन तथा ओसरपसार नियन्त्रणके क्षेत्रमे जिल्ला प्रहरी कार्यालय कैलालीसे सम्पादन हुइल कार्य ओ अइना योजनाबारे प्रस्तुतीकरण करटी सिमानाकामे चेकजाँच करेबेर बेचविखनके जोखिममे परे सेक्ना वर्गहे नाकामे रोक्न करल बटैली । सीमानाकासे ३ सय १८ जनहनहे रोक्कके पारिवारिक मिलन कराइल उहाँ बटैली ।

चार बर्षके तथ्याङक सार्वजनिक करटी उहाँ आर्थिक बर्ष २०७६÷०७७ सालमे ११ जनहनहे पक्राउ करके मुद्दा दर्ता करल, आर्थिक बर्ष २०७७÷०७८ सालमे १८ जनहनहे पक्राउ करके १७ उप्पर मुद्दा दर्ता करल, आर्थिक बर्ष २०७८÷०७९ मे ७ जनहनहे पक्राउ करके मुद्दा दर्ता करल ओ आर्थिक बर्ष २०८९÷०८० मे ३ हे पक्राउ करके मुद्दा दर्ता करल बटैलै ।

प्रहरीके अइना योजना सामुदायिक प्रहरी साझेदारी कार्यक्रमहे थप प्रभावकारी रुपमे संचालन कैना, सिमानाकामे थप कडाईके साथ चेकजाँच कैना, सिमानाकामे प्रविधिक निगरानी बहै्रना ओ आन्तरिक बेचविखन रोकथाम कैना मनोरन्जन तथा सत्कार सेवाके नियमित अनुगमन कैना बटैलै । बेचविखनमे परुइया जाहेरी दरखास्त डेहे नइचाचहल, बयान फेर्ना, मौसमी आप्रवासन ओ बालविबाह मानव बेचविखन तथा ओसारपसारके चुनौती रहल प्रहरी निरिक्षक अधिकारी बटैली ।

महिला बालबालिका तथा जेष्ठ नागरिक मन्त्रालयके महिला सशक्तीकरण महाशाखाके सहसचिव लक्ष्मीकुमारी बस्नेत मानव बेचविखन तथा ओसारपसार निन्त्रयणके लाग मन्त्रालयसे करल प्रयास ओ भावी कार्यदिशाबारे जानकारी डेटी नेपाल सरकारके सहयोग ओ समन्वयमे १० ठो पुनस्र्थापना केन्द्र संचालन, आर्थिक बर्ष २०७८÷०७९ मे २४ सय ४७ ओ चालु आर्थिक बर्षमे १३ सय ९० जानेक आन्तरिक ओ एक जानेक वैदेशिक उद्दार तथा पुनस्र्थापना करल बटैली । पारिवारिक पुर्नमिलन हुई नइसेक्के पुनस्र्थापना केन्द्रके संरक्षणमे रहल ४४ जनहनहे महिला तथा किशोरीहे सीप तथा रोजगारमुलक तालिम प्रदान करल बटैली ।

सुदूरपश्चिम प्रदेश सामाजिक विकास मन्त्रालयके अधिकृत जयन्ती गिरी मानव बेचविखन तथा ओसारपसार विरुद्धके प्रदेशस्तरीय संजाल गठन तथा संचालन कार्यविधि २०७७ निर्माण, गत विगतमे मानव वेचविखन तथा ओसारपसार विरुद्धके सचेतनामुलक ब्रोसर ओ स्टिकर छपाई करके स्कुल कलेज लगायत स्थानमे वितरण करल बटैली ।

कार्यक्रममे सामाजिक विकास मन्त्रालयके सहसचिव गणेशबहादुर सिंह आर्थिक अभावके कारण महिला तथा यूवती औरके भर परेबेर ओइनके कम्जोरीके फाइदा उठैटी मानव वेचविखन तथा ओसार पसार हुइना करल बटैलै । यिहीहे रोक्न पूर्व तयारी करे पर्ना, चल्टी रहल कार्यक्रमहे निरन्तरता डेहे पर्ना बटैलै ।

कार्यक्रममे फाया नेपालके सचितानन्द जोशी, गोमा आचार्य, निडस नेपालके बसुन्धरा बस्नेत, नेपाल राष्ट्रिय दलित समाज कल्याण संघके अध्यक्ष चक्र विक, माइती नेपालके शिवचरण चौधरी, घोडाघोडी नगरपालिकाका महिला तथा बालबालिका शाखाके निरिक्षक इन्द्र जोशी, सिएसएसडीके बलबहादुर शिलाधर लगायत अपन बाट राखल रहिट ।

कार्यक्रममे टमान पालिकाके प्रमुख, उपप्रमुख, कर्मचारी ओ सरोकारवाला निकायके प्रतिनिधिहुकनके सहभागिता रहे ।
महिला बालबालिका तथा जेष्ठ नागरिक मन्त्रालयके सहसचिव लक्ष्मीकुमारी बस्नेतके अध्यक्षतामे हुइल कार्यक्रम संचालन मन्त्रालयके अधिकृत पुष्पादेवी राई करल रहिट ।