टिसरा भजहर कप फुटबल प्रतियोगिता सुरु
पहुरा समाचारदाता
धनगढी, १६ बैशाख । कैलालीके कैलारी गाउँपालिका वडा नम्बर ८ लोहरपुरमे टिसरा भजहर कप फुटबल प्रतियोगिता सुरु हुइल बा । थारु समुदायके पर्व भजहरके अवसरमे हरेक बर्ष हुइटी आइल भजहर कपके टिसरा संस्करण शुकसे सुरु हुइल हो ।
युवा जनहित क्लबके आयोजनामे सुरु हुइल प्रतियोगिताके कैलारी गाउँपालिका वडा नम्बर १ के वडाध्यक्ष तथा कैलारी गाउँपालिकाके कार्यवहाक अध्यक्ष ध्वजबहादुर बोहरा उदघाटन करलै । पहिचानमे आधारित खेलकुद विकासमे हमार रहर, थारु कला संस्कृति संरक्षणके लाग भजहर कना नाराके साथ सुरु हुइल प्रतियोगिताके उदघाटन खेलमे गौरीगंगा ११ स्पोर्टस क्लव विजयी हुइल बा । गदरियाके मसुरीया ११ स्पोर्टस क्लबहे ३–१ लसे हरैटी गौरीगंगा क्वाटरफाईनलमे प्रवेश करल हो । खेलके प्लेयर अफ द म्याच गौरीगंगा ११ के ललित ऐर हुइलै । उहाँ नगद एक हजार प्राप्त करलै ।
बैशाख २३ गतेसम आयोजना हुइना प्रतियोगिताके विजेता नगद एक लाख तथा उपविजेता नगद ५० हजार सहित ट्रफी प्राप्त करही । प्रत्येक खेलके म्यान अफ द म्याचसे नगद एक हजार पाईबेर टमान विधाके उत्कृष्ट खेलाडीहेफे पुरस्कार वितरण कैना आयोजक श्री जनहित युवा क्लबके अध्यक्ष मणिराम चौधरी जानकारी डेलै ।
थारु समुदायके पर्व भजहरहे नयाँ पुस्तामे संरक्षण करटी आघे बढाईक लाग करटी आइल प्रतियोगितामे फुटबल प्रतियोगिताके साथे पौराणिक खेलकेफे आयोजना करल बा । ओकर साथे थारु कला संस्कृतिफे प्रस्तुत करटी रहल आयोजक जनैले बा ।
