६ सय १९ जाने लेलै सेवा

पहुरा समाचारदाता
हसुलिया, १६ बैशाख । कैलाली जिल्ला कैलारी गाउँपालिकामे शनिच्चर रोज हुइल निशुल्क विशेषज्ञ स्वास्थ्य शिविरमे ६ सय १९ जाने सेवा लेले बटै ।

जेम्ने महिला ४ सय ७६ जाने पुरुष १ सय ४३ करके ६ सय १९ जाने सेवा लेहल कैलारी गाउँपालिका स्वास्थ्य शाखाके प्रमुख नरेशकुमार चौधरी बटैलै । ओम्नसे भिडिओ एक्सरे सेवा ७० जाने लेहल उहाँ बटैलै ।

कैलारी गाउँपालिकाके आयोजना तथा सहकार्य एवं लायन्स क्लब अफ धनगढी ओ निसर्ग अस्पताल धनगढीके आर्थिक तथा प्राविधिक सहयोगमे हुइल एक दिने निशुल्क विशेषज्ञ स्वास्थ्य शिविरके उदघाटन गाउँपालिका अध्यक्ष राजसमझ चौधरी करल रहिट । कार्यक्रममे बोल्टी उहाँ निशुल्क स्वास्थ्य आयोजनामे आर्थिक अवस्था कम्जोर व्यक्ति स्वास्थ्य उपचार पैना बटैलै ।
कैलारी गाउँपालिका भौतिक विकाससंगसगे स्वास्थ्य, शिक्षामे ढेर महत्व डेहल बटैलै । यिही आघे गाउँपालिका टमान स्वास्थ्य संस्थासे सहकार्य करके औरफे निशुल्क स्वास्थ्य शिविरके आयोजना कैसेकल बटैलै ।

आज निशुल्क विशेषज्ञ स्वास्थ्य शिविरके आयोजना हुइल बा,’ अध्यक्ष कहलै, यिहीसे आघे निशुल्क सिकलसेकल एनिमिया जाँच, निशुल्क आँखी जाँच, निशुल्क महिलाके पाठेघरके मुहमे हुइना क्यान्सर, निशुल्क दाँच जाँच शिविरके हुइल बा ।’
उहाँ कहलै, ‘कैलारी गाउँपालिकासे स्वास्थ्य क्षेत्रओर गर्भवती महिला बच्चा जलमैना यिहे सम्भव नइहुइल बेला धनगढी गैलेसे निशुल्क एम्बुलेन्सके व्यवस्था करल बा । नेपाल रेडक्रस सोसाइटीसे समन्वय करके कैलारीबासीनहे निशुल्क रगतके व्यवस्था ओ सुत्केरीहुकनहे पोषण कोसेली उपहारके व्यवस्था करल बा ।’

शिविरमे सामान्य चिकित्सा सम्बन्धी विशेषज्ञसे स्वास्थ्य परिक्षण तथा जाँच, स्त्री तथा प्रसुती रोग सम्बन्धी विशेषज्ञसे स्वास्थ्य परिक्षण तथा जाँच, जनरल सर्जरी विशेषज्ञसे स्वास्थ्य परिक्षण तथा जाँच, हाडजोर्नी तथा नसारोग सम्बन्धी विशेषज्ञसे स्वास्थ्य परिक्षण तथा जाँच, मानसिक रोग सम्बन्धी विशेषज्ञसे स्वास्थ्य परिक्षण तथा जाँच तथा परामर्श सेवा, बालरोग विशेषज्ञसे स्वास्थ्य परिक्षण तथा जाँच तथा परामर्श सेवा डेहल रहे ।

ओस्टेक दन्त चिकित्सकसे स्वास्थ्य परिक्षण तथा उपचार सेवा, रोगके प्रकृती अनुसार चिकित्सकसे सिफारिस करल निशुल्क औषधि वितरण, आवश्यकता अनुसार ल्याब सेवा, मनोसामाजिक परामर्श सेवा, स्वास्थ्य शिविरमे शल्यकृयाके लाग सिफरिस हुइल हरेक विरामीहुकनहे ल्याब सेवामे २५ प्रतिशत छुटके व्यवस्था तथा अप्रेसन शुल्कमे १५ प्रतिशत छुटके व्यवस्था हुइना जनागिल बा ।

गाउँपालिका स्वास्थ्य शाखा प्रमुख नरेश चौधरी यिहीसे आघे गाउँपालिकाके आयोजनामे वैशाख ३ गतेसे ६ गतेसम हुइल निःशुल्क सिकलसेल एनिमिया जाँच शिविरमे कैलारी गाउँपालिकामे १ सय २१ जाने सिकलसेलके लौव विमारी पत्ता लागल रहिट ।

ओस्टेक कैलारी गाउंपालिकाके स्वास्थ्य शाखा, ओरेक नेपाल ओ सहास नेपालके सयुक्त सहकार्यमे चैत २० से २३ गतेसम हुइल निशुल्क महिलाके पाठेघरके मुहमे हुइना क्यान्सर शिविरमे जम्मा ५ सय ७२ जाने सेवा लेहल रहिट । गौरी शंकर डेन्टल अपन बार्षिकोत्सवके अवसरमे कैलारी गाउँपालिकाके समन्वयमे करल निशुल्क दाँच जाँच शिविरमे शिविरमे २ सय ५० जाने सेवा लेहल रहिट ।

चैत ८ गते रोटरी अष्ट्रेलिया ओ रोटरी क्लब अफ सेन्ट्रल बाँकेके संयुक्त आयोजना तथा कैलारी गाउँपालिकाके सहकार्यमे हुइल आँखी जाँच शिविर ७५७ जाने सेवा लेहल रहिट । शिविरमे ३९६ महिला ओ ३६१ जाने पुरुष आँखी जाँच करैले रहिट ।