दुई दिने खेलकुद पत्रकारिता तालिम सुरु
पहुरा समाचारदाता
धनगढी, १७ बैशाख । कैलालीमे खेलकुद पत्रकारिता तालिम सुरु हुइल बा । जिल्लाके चुरे गाउँपालिकास्थित खानीडाँडामे दुई दिने खेलकुद पत्रकारिता तालिम सुरु हुइल हो ।
नेपाल खेलकुद पत्रकार मञ्च कैलालीके आयोजना ओ आन्तरिक मामिला तथा कानून मन्त्रालय सुदूरपश्चिमके सहकार्यमे तालिम सुरु हुइल हो । तालिमके उदघाटन आन्तरिक मामिला तथा कानून मन्त्रालयो उपसचिव विश्वदिप बेस्रा करल रहिट । उहाँ पछिल्का समय पत्रकारिता क्षेत्रके विस्तार हुइटी रहल बटैलै ।
विगतमे कुछ सीमित बिधामे केल पत्रकारिता कैना प्रचलन रहल बटैटी उहाँ पछिल्का समय भर सक्कु क्षेत्रमे कलम चलाई लागलप्रति खुसी व्यक्त करलै । दई दिने तालिमसे खेलकुद पत्रकारिता झन गतिशिल हुइना उहाँक विश्वास रहे । कार्यक्रमके विशिष्ट पहुना नेपाल पत्रकार महासंघ सुदूरपश्चिम प्रदेश समितिके अध्यक्ष योगेश रावलसे पछिल्का समय कैलालीमे खेलकुद पत्रकारितामे बहुट सक्रियता डेखल कहटी खुसी व्यक्त करलै ।
नेपाल खेलकुद पत्रकार मञ्चके केन्द्रीय सदस्य नविन लुइटेलसे सक्कु क्षेत्रके पत्रकारिता करेक लाग ज्ञान आवश्यक रहल बटैटी दुई दिने प्रशिक्षण महत्वपूर्ण हुइना विश्वास व्यक्त करलै । खेलकुद पत्रकार मञ्च कैलालीके अध्यक्ष प्रदीप पाठक सुदूपश्चिम खेलकुद क्षेत्रके लाग बहुट धनी क्षेत्र रहल बटैटी खेलकुदके गतिविधि उठान करेक लाग पत्रकारहेफे विज्ञता चाहल बटैलै । खेल पत्रकारितामे निखारता नानेक लाग अघिल्का वर्षसे प्रशिक्षण देहे लागल उहाँक कहाई रहे ।
वरिष्ठ एथ्लेटिक्स तथा त्रिभुवन विश्वविद्यालयके खेल तथा विज्ञानके प्राध्यापक शुशिल नरसिंह राणा, नेपाल खेलकुद पत्रकार मञ्चके केन्द्रीय सदस्य नविन लुइटेल, टेलिभिजन खेल पत्रकार अनन्त वाग्ले ओ खेल पत्रकार यज्ञराज जोशीसे दुई दिनसम प्रशिक्षण देना कार्यक्रम रहल आयोजक खेलकुद पत्रकार मञ्च कैलालीके महासचिव हरि जोशी जानकारी डेलै । प्रशिक्षणमे कैलालीके ४० ढेर पत्रकारके सहभागिता रहल वरिष्ठ उपाध्यक्ष शंकर बोहरा बटैलै ।
