थारु मग्गर गोटियार समापन

पहुरा समाचारदाता
पहलमानपुर, १७ वैशाख । घरगोटियारभित्तर भोजव्याह नाहोए ओ पूजापाठमे एकरुपता कायम करना उद्देश्यसे घोडाघोडी–११, मुर्गहुवामे नवौं थारु मग्गर गोटियार समापन हुइल बा ।

कार्यक्रम थारु मग्गर गोटियार समितिके सदस्य महवीर चौधरीके घरगोसियामे हुइल रहे कलेसे बर्का पहुना थारु मग्गर गोटियार समितिके केन्द्रीय अध्यक्ष भरथरी चौधरी रहैं । उहाँ अपन गोटियार पहिचानके लाग यी सम्मेलनके आवश्यकता रहल बटैलैं ।

अस्टेक कार्यक्रममे घोडाघोडी नगरपालिका पडा नम्बर १२ के वडाध्यक्ष रामदुलारे चौधरी जो गोटियार खोज्ना काम जारी बा । और हमार अपन गोटियारके चाला चलानहे पूरा कर्ना जिल्ला और क्षेत्रीय कमिटी बनैना जरुरी बटैलैं ।

कार्यक्रममे बुद्धिजीवी विष्णु चौधरी गोटियारनके भोजकाज संस्कृतिकृ भिडियो बनाके इतिहाँस झलकैना जरुरी रहल बटैलैं । कार्यक्रममे पुनीराम चौधरी, शिवकुमार चौधरी, भगवती चौधरी, पार्वती चौधरी, प्रेमलाल चौधरी, मीना चौधरी, लक्ष्मी चौधरी, कृष्णकुमार चौधरी, कुलाराम चौधरी, जोखुराम थारुलगायत मन्तव्य व्यक्त करले रहैं ।

समितिके बिमाला चौधरी स्वागत करल कार्यक्रमके सञ्चालन सचिव निरंजन चौधरी करले रहैं ।