अतिक्रमित वनक्षेत्र खाली करागिल
पहुरा समाचारदाता
धनगढी, १८ वैशाख । कैलालीके अत्तरियामे अतिक्रमित वनक्षेत्र खाली कैगिल बा । गोदावरी नगरपालिका–३, अत्तरियास्थित चौकीडाँडामे अतिक्रमित क्षेत्र खाली कराइक लाग वन कार्यालय सोम्मारके रोज डोजर चलैले बा ।
डिभिजन वन कार्यालय कैलालीके निमित्त प्रमुख भीम ढकाल करिब पाँच सय ढेर घर टहरा हटाइल जानकारी डेलैं । उहाँ उ क्षेत्रमे रहल पूर्व–पश्चिम राजमार्ग ओ वन अतिक्रमण कैके बनाइल अन्य घर टहरा फेन हटैना अभियान जारी रहना बटैलैं । उहाँ कलैं, ‘वर्षैसे सडक तथा जंगलकिनारमे टहरा निर्माण बैठलहुकनके घर टहरा भस्काके खाली करल बा ।’
सब–डिभिजन वन कार्यालय अत्तरिया कुछ दिनआघे अतिक्रमित वनक्षेत्र खाली करैना पत्राचार ओ माइकिङ करलेसे फेन ओकर सुनुवाइ नैहुइलपाछे सोम्मार डोजर चलाइल हो । कुछ महिना आगे बाढपीडित ओ सुकुम्वासीके नाममे चौकीडाँडा महिला सामुदायिक वन अतिक्रमण कैके घर टहरा बनैले रहैं ।
वन डिभिजन कार्यालय कैलाली दुईठो डोजरके सहायतासे गोदावरी नगरपालिका ओ स्थानीय बासिन्दासँगके सहकार्यमे अतिक्रमित वनक्षेत्र खाली करल हो । अतिक्रमित वन क्षेत्र खाली करना वन सुरक्षाकर्मी तथा नेपाल प्रहरीसहित भारी संख्यामे सुरक्षाकर्मी परिचालन करल रहे ।
चौकीडाँडामे तीन वर्षसे जंगलकिनारमे टहरा निर्माण कैके बैठ्टि आइलके घर टहरा भस्काके पूरेक्षेत्र खाली करल डिभिजन वन कार्यालय जनैले बा । सडक किनारमे वन क्षेत्रके जमिन ओगटके घर टहरा निर्माण कैके बैठटि आइलहुक्रे विरोध करलेसे फेन डिभिजन वन कार्यालय अतिक्रमित क्षेत्र खाली करैना डोजर चलैले बा ।
उ क्षेत्रमे अधिकांश दलित समुदायके बसोबास रहे । भूमि नैरहलहे भूमिके व्यवस्था कैडेहेपरना कटि उहाँहुक्रे पूर्व–पश्चिम राजमार्गके सडक किनारमे तीन वर्षआघे बस्ती बैठैले रहैं ।
