परराष्ट्र मन्त्री साउँदसे बेलौरी छोटी भन्सारके अनुगमन
पहुरा समाचारदाता
कञ्चनपुर, १८ बैशाख । परराष्ट्र मन्त्री एनपी साउँदसे कञ्चनपुरके बेलौरी छोटी भन्सार कार्यालयके स्थलगत अनुगमन करले बटै । पछिल्का एक वर्षयहोर तालाबन्दी अवस्थामे बेवारिसे रहल बेलौरी छोटी भन्सार कार्यालय ओ करिब एक शताब्दी पुरान भन्सारके जीर्ण भवनके सोम्मार दुपहर स्थलगत अनुगमन करटी मन्त्री साउँदसे उ भन्सार कार्यालयहे फेरसे सञ्चालनके लाग सम्बन्धित मन्त्रालयसंग समन्वय करे पर्ना बटैलै ।
मन्त्री साउँदहे अन्तर्राष्ट्रिय सीमा सरोकार समूहसे कञ्चनपुर लगायत देशके टमान क्षेत्रमे डेखल सीमा विवाद समाधान सहितके टमान माग करटी ज्ञापन पत्र पेस करल समूहके संयोजक पल्लवराज भट्ट जानकारी डेलै । बेलौरी नगरपालिका कार्यालयमे आयोजित भेटघाट कार्यक्रममे नगर प्रमुख पोतिलाल चौधरी सहित जनप्रतिनिधि ओ सरोकारवाला पक्षसे मन्त्री साउँदसँग समसामयिक विषयमे छलफल करल बताइल बा । उ क्रममे बेलौरी उद्योग वाणिज्य संघसे समेत टमान माग रख्टी ज्ञापनपत्र पेस करल बेलौरी उद्योग वाणिज्य संघके अध्यक्ष हिरासिंह बिष्ट बटैलै । नेपालसंग जोरल अन्तर्राष्ट्रिय सीमामे डेखल सीमा विवादहे वार्ता, छलफल ओ कूटनीतिक पहलसे समाधान कैना परराष्ट्र मन्त्री साउँदके कहाई बा ।
यिहे बैशाख ३ गते परराष्ट्र मन्त्रीमे नियुक्त हुइलपाछे पहिल चो गृह जिल्ला कञ्चनपुर पुगल साउँद सोम्मार नेपाली काँग्रेस कञ्चनपुर क्षेत्र नम्बर १ से आयोजना करल बधाई ज्ञापन तथा कार्यकर्ता भेटघाट कार्यक्रमहे समेत सम्बोधन करले बटै ।
मन्त्री साउँदसे कौनो समय अपनेफे कञ्चनपुर क्षेत्र नम्बर १ से निर्वाचित हुके संसदमे पुगल स्मरण करटी यहाँके समस्या समाधानके लाग केन्द्रित हुइना प्रतिबद्धता जनैलै । सुदूरपश्चिम प्रदेश सभा सदस्य दिवान सिंह बिष्टसे संघीय सरकारमे परराष्ट्र मन्त्रीके जिम्मेवारी सम्हारलमे मन्त्री साउँदहे बधाई ज्ञापन करटी कञ्चनपुर क्षेत्र नम्बर १ के समस्या अवगत करैटी समाधानके लाग आग्रह करलै ।
उहाँ बेलौरी भन्सार, सीमा विवाद, हुलाकी सडकखण्डमे भारतके अवरोध लगायतके विषयमे मन्त्री साउँदके ध्यानाकर्षण करैलै । उ क्रममे नेपाली काँग्रेसके क्षेत्रीय समिति, गाउँ तथा नगर समिति, स्थानीय जनप्रतिनिधि, नागरिक अगुवा ओ टमान संघ संगठनसे विविध समस्या समाधानके लाग मन्त्री साउँदहे ज्ञापनपत्र पेस करल बटाइल बा ।
