कैलारी–९ जमनीपुरसे तीन लउण्डी तीन दिनसे सम्पर्क विहिन

पहुरा समाचारदाता
हसुलिया, २५ बैशाख । कैलालीके कैलारी गाउँपालिका वडा नम्बर ९ जमनीपुरसे तीन लउण्डी तिन दिनसे सम्पर्क विहिन रहल बटै ।

इलाका प्रहरी कार्यालय हसुलियासे डेहल जानकारी अनुसार तिनु जाने यिहे बैशाख २३ गते साँझके सातसे सम्पर्क विहिन बटै ।
परिवारके सम्पर्क विहिनमे कैलारी गा.पा. ९ जमनीपुर बैठना बर्ष १७ के सुबिच्छा चौधरी, बर्ष १४ के अविच्छा चौधरी ओ बर्ष १७ के बबि चौधरी रहल इलाका प्रहरी कार्यालय हसुलियाके इन्चार्ज प्रहरी नायव निरिक्षक राजेन्द्रसिंह कार्की जनैलै ।

तीनु जाने शनिच्चरके साँझ सात बजे घरसे कुहीहे जानकारी नइकराके घरसे भागके फरार रहल ओ आफन्तके घरमे समेत सोधपुछ तथा खोजतलाश करेबेर फेला नइपरलपाछे ओइनके आफन्त इलाका प्रहरी कार्यालय हसुलियामे मौखिक जानकारी कराइल उहाँ प्रहरी जनैलै । तिन दिनसे सम्पर्क विहिन रहल तीन जनहनहे प्रहरी खोजतलास करटी रहल बा ।

सुबिच्छा चौधरीके डाई जग्मा चौधरी ओइने २३ गते रातके १० बजेसम जोनापुरसम पुगल पत्ता लागल बटैली । ओइने जोनापुगेबेर दुई ठो पल्सर मोटरसाइकलमे पाँच पुगल रहिट । ओठेहेसे अभिनसम सम्पर्क विहिन रहल बटैली । ओइने बोकल मोवाइलफे स्वीचअफ रहल उहाँ बटैली ।