पालिकामे डेखल समस्या समाधानमे ध्यान डेउ
संघीयता लागु हुइलपाछे सिंह दरबार गाउँघरमे कहिके नारा लगागिल मने उ चाही नारामे सिमित हुइल डेखल बा । मानवअधिकारके सवालमे विशेष करके शिक्षा, स्वास्थ्य, लैङ्गीक हिंसा न्यूनिकरण ओ वातावरण अधिकारके क्षेत्रमे समस्या डेखल बा । विद्यालयमे विषयगत (गणित, विज्ञान ओ सामाजिक) विषयके शिक्षक नइरहल कारण गुणस्तरीय शिक्षा प्रदान कैना समस्या डेखल डेखल बा । टमान विद्यालय एक ठो फे दरबन्दी नइरहल ओरसे गुणस्तरीय शिक्षा प्रदान कैना समस्या डेखल ओरसे उ विषयगत शिक्षक व्यवस्थापन कैना आवश्यक रहल बा ।
पालिकाभिटरके अधिकांश विद्यालयमे शुद्ध खानेपानी व्यवस्था नइरहल कारण बालबालिका अशुद्ध पानी पिना बाध्य हुइल ओरसे उ व्यवस्थापन कैना आवश्यक रहल बा । दिवा खाजाके व्यवस्था करलेसेफे अधिकांस विद्यालयमे गुणस्तरीय खाजा नइडेना करल ओरसे ओकर अनुगमन करके मापदण्ड अनुसारके दिवा खाजाके व्यवस्था कैना आवश्यक रहल बा । गुणस्तरीय स्वास्थ्य अधिकारके लाग नेपाल सरकारसे ओपिडी सेवाके समय ३ बजेसम निर्धारण करल कहलेसेफे प्राथमिक स्वास्थ्य केन्द्रमे ओपिडी सेवा उहीसे आघे बन्द हुइना करल ओरसे ओकर अनुगमन कैना जरुरी ।
स्वास्थ्य केन्द्रमे नेपाल सरकारसे निशुल्क वितरण कैना औषधीके नामावली ओ सुझाव तथा गुनासो पेटीका नइधारल कारण सेवाग्राहीहे सूचना लेना तथा सुझाव दिन समस्या हुइटी बा । प्राथमिक स्वास्थ्य केन्द्रमे इसिजी मेसिन जडान हुइल मने कर्मचारीके अभावमे संचालनमे आइनइसेकल ओरसे ओकर व्यवस्थापन कैना आवश्यक बा । स्वास्थ्य बिमा मार्फत सेवा लेना नागरिकके रेफरल कार्ड बनैना प्रक्रिया झञ्झटिलो हुइल सेवा लेना गाह्रो हुइल ओरसे सहज बनैना आवश्यक रहल बा । प्रशुति गृहमे आवश्यक मेसिन औजार तथा बेडके अभाव रहल ओरसे सेवाग्राहीहुकनहे सहज रुपमे सेवा लेना कठिनाई डेखल बा । लैङ्गिक हिंसा न्यूनिकरणके लाग लैङ्गिक हिंसाके घटनाहे स्थानीयस्तर वा समाजमे मिलापत्र करैना हुइल कारण पीडित व्यक्ति न्याय नइपैना हुइल ओरसे स्थानीय पालिकासे ओकर सचेतना कार्यक्रम संचालन कैना आवश्यक डेखल बा । स्थानीय तहमे दर्ता नइहुके संचालनमे रहल मदिरा पसलहे आवश्यक प्रक्रिया पुरा करके दर्ता करैना तथा व्यवस्थित रुपमे संचालन करैना आवश्यक रहल बा । सम्मान कामके लाग समान ज्यालाके व्यवस्था कानूनी रुपमे हुइलेसेफे व्यवहारिक रुपमे कार्यन्वयन हुई नइसेकल ओरसे अनुगमन करके कार्यन्वयनमे जोड डेहे पर्ना लगायतके सार्वजनिक सरोकारके सवाल समावेस करल बा ।
