एकीकृत समाजवादीसे भ्रष्टचार विरुद्ध प्रदर्शन
पहुरा समाचारदाता
धनगढी, २८ बैशाख । नेपाल कम्युनिष्ट पार्टी (एकीकृत समाजवादी)से धनगढीमे प्रदर्शन करले बा ।
नेकपा एसके कैलाली जिल्ला कमिटीसे भ्रस्टाचार विरुद्ध जुलुससहित प्रर्दशन करल हो । प्रदेशके अस्थायी मुकाम धनगढीके एलएन चोकसे सुरु हुइल प्रदर्शन जिल्ला प्रशासन कार्यालय कैलालीके प्रवेशद्वारमे नारावाजी कैटी कोणसभामे परिणत हुइल रहे ।
नेपालीहे भुटानी शरणार्थी बनाके भ्रस्टाचार करुइया गिरोहहे कानूनी दायरामे लन्ना माग करटी प्रर्दशन करल जिल्ला अध्यक्ष विमल जोशी बटैलै ।
सरकारसे भ्रस्टाचार काण्डमे बरवार नेताहे पक्राउ करल काम स्वागत योग्य रहल कहटी उ प्रकरणमे नाउँ जोरल सक्कु जनहनहे कानूनी दायरामे लन्ना माग करले बाटै । कोणसभामे बोल्टी अध्यक्ष जोशी कहलै–पार्टीसे भ्रस्टाचारीके विरुद्ध आन्दोलन कैना बा, जे कोइ उ काण्डमे जोरल बावै, कार्वाही करे परल । सबके सत्यतथ्य छानविन हुइ परल । सरकारसे भ्रस्टाचारी जोगैना चलखेल आपन पार्टीहे सैह्य नैहुइना जोशी बटैलै ।
प्रर्दशनमे नेकपा (एकीकृत समाजवादी) केन्द्रीय सदस्य कैलाली इन्चार्ज दीर्घ सोडारी, केन्द्रीय सदस्य लक्ष्मी चौधरी, गीता सोडारी, शुसीला बुढाथोकी, युवा संघका केन्द्रीय कार्यालय प्रमुख नरेश गिरी लगायतके नेता कार्यकता सभागी रहिट ।
