ढुरधुँवा नियन्त्रणके माग कैटी सडक अवरुद्ध
पहुरा समाचारदाता
धनगढी, २९ बैशाख । कैलालीमे ढुरधुँवा नियन्त्रण माग कैटी सडक अवरुद्ध करल बा । शुकके सकारे कैलालीके स्याउलेमे धनगढी–दिपायल फास्ट ट्रयाक अन्तगर्तके सडकमे ढुरधुँवा नियन्त्रणके माग कैटी सडक अवरुद्ध करल हुइट ।
स्याउले बजार व्यवस्थापन समितिके अध्यक्ष गोपाल देउवा सडक निर्माणके जिम्मा लेहल खड्का कृष्ण जेबी निर्माण कम्पनी व्यवास्ता कैके ढुरधुँवा उरलपाछे स्थानीय सडक अवरुद्ध करल बटैलै । उहाँ ढुलाम्मे सडकसे आसपासके नागरिकके स्वास्थ्य अवस्था जोखिमे पर्नाके साथे स्याउले बजारके व्यवसाय नै धरापमे परल बटैलै ।
ढुर नियन्त्रण नैहुइटसम सडक अवरुद्ध कैना उहाँ बटैलै । स्कुलबस, एम्बुलेन्स लगायतके ईमरजेन्सी सवारी साधन भर सञ्चालन हुइ डेना अध्यक्ष देउवा बटैलै ।
अब्बे तत्काल पिच नैहुइलपाछे पानी सिँचाइकैके ढुर उरे नैडेना बनाइ कना स्थानीयके माग रहल बा ।
दैनिक सयौं गाडी आवातजावत कैना सडकके अवस्था लम्मा समयसे अलपत्र होके ढुर उरके स्वास्थ्यमे असर करल कहटी आन्दोलनमे उत्रल स्थानीयके कहाइ रहल बा । तत्काल सडक निर्माण हुइ नैसेक्लेसे फेन ढुर उर्ना कम करक ला सडकमे नियमित पानी सिँचाइ कैना माग करल हुइट ।
