थारु आन्दोलनके महिला नामक फोटो पुस्तक विमोचन
पहुरा समाचारदाता
धनगढी, ३० बैशाख । थारु आन्दोलनमे महिलाहुक्रनके खेलल् भूमिकाके सम्मानमे थारु आन्दोलनके महिला नामक फोटो पुस्तक विमोचन करल बा ।
महिला अधिकारके क्षेत्रमे काम कैना संस्था लुम नेपालसे प्रकाशन करल उ पुस्तकके शुकके सुदूरपश्चिम प्रदेशके उप–सभामुख कोइली देवी चौधरी एक कार्यक्रमके बिच विमोचन करल रही ।
टमान थारु आन्दोलनमे आपन जस्टे थारु महिलाहुक्रनके भूमिकाहे ऐतिहासिक दस्ताबेजके रूपमे सुरक्षित कैना काम करल कहटी उहाँ लुम नेपालहे धन्यवाद डेली ।
थारु किल नैहोके देशके सक्कु महिला आभिन फेन पाछे बाटै । उहाँ कहली ‘नेपालके हरेक आन्दोलनमे महिला प्रयोग हुइना मने इतिहास पुरुषके किल बन्ना अभ्यासके बिच महिला सशक्तिकरणमे लुम नेपालसे सुरु करल अभियान ऐतिहासिक रहल बा । औरे जे फेन यकर सिको कैना आवश्यक बा । अत्रे किल नैहोके कौनो फेन वर्ग, समुदायमे विभाजित नैहोकेअधिकारके लाग महिलाहे एकताके साथ आघे बह्रे पर्ना अब्बेक आवश्यकता हो ।’
सन २०१६ से महिला अधिकारके क्षेत्रमे काम कैके पहिचान बनाइल महिला अधिकारकर्मीहुक्रनके इतिहासके अभिलेखीकरण कैना काम सुरु करल लुम नेपालके उपाध्यक्ष पुष्पा जोशी बटैली ।
‘सन २०१९ से थारु आन्दोलनमे सक्रिय बनके योगदान डेहल १५ से २० जहनके इतिहास अभिलेखीकरण कैटी आइल बाटी । उहे अनुरूप हम्रे फोटो पुस्तक निर्माण करल हुइटी,’ उहाँ कहली ।
१६ फोटो एल्बम नाम डेहल उक्त पुस्तकमे थरुहट तथा मुक्त कमैया आन्दोलनमे महत्त्वपूर्ण भूमिका खेलल् १६ जाने थारु महिलाके फोटो तथा इतिहासके अभिलेख समावेश करल बा ।
