टीकापुर मुद्दामे बहस फेरसे हेरटीक हेरटीमे धारल
पहुरा समाचारदाता
काठमाडौं १ जेठ । टीकापुर घटनाके प्रतिवादी रेशमलाल चौधरी लगायतके मुद्दा सोम्मारफे हेरटीक हेरटीमे धारल बा ।
सोम्मार सर्वोच्च अदालतके न्यायाधीशद्वय डा. आनन्दमोहन भट्टराई ओ नहकुल सुवेदीके संयुक्त इजलासमे परल उ मुद्दामे बहस नइसेकलपाछे फेरसे हेरटीक हेरटीमे धारल हो ।
यी आघे कैलाली जिल्ला अदालत ओ उच्च अदालत दिपायलसे टिकापुर घटनामे दोषी ठहर करलपाछे रेशमलाल चौधरी अब्बे कारागार कार्यालय डिल्ली बजारमे कैद सजाय भुक्तान करटी रहल बटै । जेलसे चौधरी उच्च अदालत दिपायलके फैसलाहे बदर करी पाउ डेहल पुनरावेदनके रिटउप्पर सर्वोच्च अदालमे बहस जारी बा ।
यी आघे प्रतिवादी रेशमलाल चौधरी लगायत १४ जाने प्रतिवादीके ओरसे सफाई पाई पर्ना कहटी बहस हुइल रहे । प्रतिवादीओरसे अधिवक्ता घटना राजनीतिक हुइल कारण राजनीतिक तबरसे हल करे पनौ ओ घटनामे संलग्न नइरहल व्यक्तिहुकनहे मुछल कहटी ओइने ओइनहे सफाई डेहे पर्ना माग करल रहे ।
जवाफी बहसमे सरकारी वकिलके ओरसे घटनाके योजनाकार रेशमलाल चौधरी ओ लक्ष्मण थारु रहल ओ अन्य व्यक्तिहुकनके संलग्नतामे घटना कराइल कहटी ओइनहे हदैसमके सजाय हुई पर्ना ओ कैलाली जिल्ला अदालत तथा उच्च अदालत दिपायलके फैसला सही रहल बहस करल रहे । मने सोम्मारके बहसमे समय अभाव हुइलपाछे मंगलबारके लाग पेसी तोकल बा ।
२०७७ फागुन १२ गते सर्वोच्च अदालतमे दर्ता हुइल उ मुद्दा बार बार हेरे नइभ्याइनामे परल रहे । गैल वैशाख २५ गते पेसीमे चह्रेबेर न्यायाधीशद्वय आनन्दमोहन भट्टराई ओ नहकुल सुवेदीके संयुक्त इजलाससे जेठ १ गतेके लाग हेरटीक हेरटीमे धारल रहे । मने सोम्मारके सुनुवाइमेफे बहस नइसेकलपाछे आब जेठ २ गते मंगरके लाग पेसी तोकल सर्वोच्च अदालतके प्रवक्ता विमल पौडेल जानकारी डेलै ।
