सुदूरपश्चिम सरकारसे आगामी बजेटबारे संघीय सांसद्सँग छलफल
पहुरा समाचारदाता
धनगढी, २ जेठ । सुदूरपश्चिम सरकारसे मुख्यमन्त्रीसहित ओ प्रदेशसे संघमे प्रतिनिधित्व करुइया प्रतिनिधि सभा सदस्यबीच आगामी बजेटबारे छलफल करले बा । संघीय राजधानी काठमाडौंमे मंगरके मुख्यमन्त्री कमलबहादुर शाह, भौतिक पूर्वाधार विकास मन्त्री प्रकाश देउवा, आर्थिक मामिला मन्त्री नरेश कुमार शाही ओ सुदूरपश्चिम प्रदेशसे प्रतिनिधित्व करुइया प्रतिनिधि सभा सदस्यबीच प्रि बजेट छलफल हुइल हो ।
सुदूरपश्चिम प्रदेशके बजेट, विकास योजनाके समीक्षासहित आगामी बजेट ओ योजनाबारे छलफल करल मुख्यमन्त्री शाहके सचिवालय जनैले बा । मुख्यमन्त्री कमल शाह सुदूरपश्चिमके विकासमे सक्कु तहके सरकारके अपनत्व खोजल बटैलै । उहाँ तिनु तहके जनप्रतिनिधिके साझा प्रयाससे किल विकास सम्भव हुइना बटैलै ।
कार्यक्रमके उद्देश्यबारे जानकारी करैटी आर्थिक मामिला मन्त्री नरेशकुमार शाही सुदुरपश्चिम प्रदेशके विकासके लाग एकीकृत अभियानके जरुरी रहल बटैलै । उहाँ प्रदेशसे बजेट बनाइक लाग स्थानीय सरकारके पदाधिकारी ओ संघीय सांसद्के सुझाव समेत समेट्ना खोजल बटैलै ।
ओस्टके भौतिक पूर्वाधार मन्त्री प्रकाश देउवा फरकफरक पार्टीसे प्रतिनिधित्व करलेसे फेन लक्ष्य अक्के रहल ओरसे सल्लाह कैके आघे बह्रे खोजल बटैलै । अब्बे ढेर माग टुक्रे योजनाके रहल बटैटी वितरणमुखी बजेटसे अपेक्षित नतिजा नैअइना ओहकान कहाइ रहे । कार्यकर्ताके दबाबमे अइना कार्यक्रमसे सुदूरपश्चिम नैबन्ना उल्लेख कैटी फरक तरिकासे सोचे पर्ना हुइल ओरसे छलफल जरुरी ठहर्याइल बटैलै ।
उपस्थित सांसद्हुक्रे सुदूरपश्चिम सरकारसे बजेटआघे सक्कु जनहनसे छलफल कैके मजा अभ्यासके थालनी करल बटाइल रहिट । नेपाली कांग्रेसके प्रमुख सचेतक रमेश लेखक बजेट बनाइबर संवेदनशील हुइ पर्ना ओर सचेत करैटी पारदर्शितामे उठ्टी रहल प्रश्न हल करे पर्र्ना उल्लेख करलै । इ बेरके बजेट शिक्षा ओ स्वास्थ्यमे ढेर केन्द्रीत बनाइ पर्ना ओहकान सुझाव रहे ।
सांसद् वीरबहादुर बलायर प्रदेशउपर प्रश्न उठ्टी रहल उल्लेख कैटी सचेत होके आघे बह्रे पर्ना बटैलै । छिटकल बजेटसे उपलब्धी लेहे नैसेक्ना हुइल ओरसे निश्चित योजना बनाके विनियोजन कैना सुझाइल रहिट ।
एकीकृत समाजवादी प्रतिनिधि सभा सांसद् भानुभक्त जोशी रोजगारमूलक काममे ध्यान डेहे पर्र्ना सुझाव डेहल रहिट । कृषिमे आत्मनिर्भर बने सेक्ना सम्भावना रहल बटैटी उहाँ कृषिमे जोड डेहे पर्ना बटैलै ।
नेकपा एमालेके सांसद् दामोदर भण्डारी आमजनमे निराशा रहल ओ सरकार समेत फेरटी रहल ओरसे राजनीतिक नेतृत्वउपर प्रश्न उठल बटैलै । सरकार फेरबदल हुइटी रहल ओरसे आगामी बजेट सहममितमे लाने पर्ना आवश्यकता रहल औंल्याइल रहिट । स्वास्थ्यके लाग आभिन फेन भारत वा संघीय राजधानीमे निर्भर रहे पर्ना अवस्था रहल ओरसे इ बेरके बजेटहे स्वास्थ्य ओर केन्द्रीत कैना सुझैलै ।
एमालेके औरे सांसद् तारा लामा सुदूरपश्चिम सरकार सक्कु जनहनहे भावनात्मक सन्देश डेना जरुरी रहल उल्लेख करलै । उहाँ आदिवासी जनजातीके जीवन उत्थानके लाग विशेष कदम चाले पर्ना बटैलै ।
राष्ट्रिय सभा सदस्य नारायणदत्त मिश्र सुदूरपश्चिमके सेती लोकमार्ग, धनगढी दिपायल फास्ट्र ट्र्याक ओ कर्णाली करिडोर पूरा कैन प्रदेश पालिकासँग समेत समन्वय कैके आघे बह्रे पर्ना बटैलै ।
निवर्तमान मुख्यमन्त्री तथा नेकपा एमाले प्रदेश संसदीय दलके नेता राजेन्द्र रावल दुर्गमहे लक्षित कैके बजेट बनाइ पर्र्ना उल्लेख करल रहिट ।
