मुक्तकमैया समाजसे पालिकास्तरीय कमिटि चयन
पहुरा समाचारदाता
धनगढी, २ जेठ । मुक्त कमैया समाज जिल्ला समिति कञ्चनपुरसे दुई पालिकामे नगरस्तरीय कमिति चयन करले बा ।
कञ्चनपुर जिल्लाके कृष्णपुर नगरपालिकामे नगरस्तरीय मुक्त कमैया समाजके अध्यक्षमे सुरज चौधरी निर्विरोध चयन हुइल बटै ।
मुक्त कमैया समाज जिल्ला समिति कञ्चनपुरके आयोजनामे नगर स्तरिय अन्तर संवाद कार्यक्रमपाछे नगरस्तरीय समिति चयन कैगिलक हो । समितिके उपाध्यक्षमे रामकृष्णी चौधरी, सचिवमे बुधराम चौधरी ओ कोषाध्यक्षमे अनिता चौधरी चयन हुइल बटै ।
मुक्त कमैया समाजके उपाध्यक्ष जग्नी चौधरीके घरगोस्यामे हुइल कार्यक्रमके वडका पहुना कृष्णपुर नगरपालिकाके उप–प्रमुख द्रोपती राना रहल रहिट ।
ओस्टेक करके बेलौरी नगरपालिकामे मुक्त कमैया पुनस्र्थापनाके लाग पालिका स्तरीय अन्तर संवाद कार्यक्रममे मुक्त कमैया समाजके कार्यविधि हस्तान्तरण करटी राधेश्याम चौधरीके अध्यक्षतामे मुक्त कमैया नगर स्तरीय कमिटी गठन कैगिल बा । कमितिके उपाध्यक्षमे सारदा देवी चौधरी, सचिवमे मनिता चौधरी ओ कोषाध्यक्ष उर्मिला चौधरी रहल बटै ।
ओस्टे सदस्यमे गुरु प्रसाद चौधरी, छविलाल चौधरी, रामबहादुर चौधरी, प्रशुनारायण चौधरी ओ आशाराम चौधरी रहल बटै ।
