बेदकोटसे मुक्तकमैया पुनर्स्थापना कार्यविधि २०७९ कार्यान्वयन कैना

पहुरा समाचारदाता
कञ्कैलाली, ३ जेठ । कञ्चनपुर जिल्लाके बेदकोट नगरपालिकाके नगरप्रमुख भोजराज बोहरा मुक्त कमैया पुनर्स्थापना कार्यविधि २०७९ कार्यान्वयन कैना बटैले बटै ।

मुक्त कमैया समाज कञ्चनपुरसे बुधके आयोजना करल मुक्त कमैया पुनस्र्थापनाके लाग पालिका स्तरिय अन्तरसम्बाद कार्यक्रममे बोल्टी उहाँ केन्द्रमे संघीय सरकारसे पास कररलपाछे अपन पालिकामेफे यकर कार्यान्वय कैना बटाइल हुइट । नगरप्रमुख बोहरा मुक्त कमैया समुदायमे बालबिबाह अन्त्य करके शिक्षामे ढेर ध्यान केन्द्रित करेपर्नाफे बटैले बटै ।

बेदकोत नगरपालिका वडा नं. ५ के वडाध्यक्ष चित्रदेब भट्ट मुक्त कमैयाहुक्रे ५ कठ्ठा जग्गा प्राप्त करलेसेफे सिचाई ओ शुद्ध खानेपानीके अभावके कारण जिविकोपार्जनममे समेत बहुट समस्या झेले परल बटैलै ।

बेदकोट नगरपालिका वडा नं. २ के वडाध्यक्ष नरेशबहादुर सिंह मुक्त कमैयाहुकनके जीवनस्तर उप्पर उकास्न रोजगार सिर्जना कैना मेरिक आयआर्जन मुलक कार्यक्रम सञ्चालन करे पर्ना आवश्यकता रहल बाट औल्यइलै ।

कार्यक्रमके कमैया महिला जागरण समाज नेपालके केन्द्रिय सदस्य रमा चौधरी मुक्त कमैयासंगे बुक्रहीहुक्रे राज्यसे सेवा सुविधा पाई पर्ना मने उ सुविधा नइपाइल कारण गुनासो पोख्ले बटी । अब पालिकाके नीति तथा कार्यक्रममे बुक्रहीहुकनहे फे समेटे पनर्ना बाटमे उहाँ जोड डेले बटी ।

मुक्त कमैया समाजके महासचिव घासीराम राना विगतमे मुक्त कमैया विधेयक सरकारसे पारित नइकरल बाटहे स्मरण करटी अब्बेक मुक्त कमैया पुनस्र्थापना कार्यविधि २०७९ हेफे अर्थ मन्त्रालयसे सरकारसे फिर्ता करल बाट दुखद रहल बटैले बटै । अब मुक्त कमैयाहुककनके आन्दोलन सुरु हुसेकल ओरसे मुक्त कमैया पुनस्र्थापना कार्यविधि २०७९ पारित करके छोरना उहाँ बटैलै ।

मुक्त कमैया समाज कञ्चनपुरके अध्यक्ष रामप्रसाद रानाके अध्यक्षतामे हुइल कार्यक्रममे स्वागत मुक्त कमैया समाज सुदुरपश्चिमके कोषाध्यक्ष अनिता चौधरी करल रहिट ।

ओस्टेक कार्यपत्र शुक्लाफाटा एफ एमके पत्रकार दानसिंह डंगौरा प्रस्तुत करल रहिट कलेसे सञ्चालन समाजके सचिव बुधीराम चौधरी करले रहिट । यिहे बिच मुक्त कमैया समाजसे वेदकोट नगरपालिकामे नगरस्तरिय १३ सदस्यीय समिति समेत चयन करले बा । जेम्ने अध्यक्ष सुरज डंगौरा, उपाध्यक्ष बिपना डंगौरा, सचिव विबेक चौधरी, कोषाध्यक्ष कविता डंगौरा चयन हुइल बटै ।

ओस्टेक सदस्यमे सुनिता थारु, माया डंगौरा, सीता डंगौरा, कुसुम डंगौरा, दलबहादुर डंगौरा, सुनिता सार्की ओ छेदुराम डंगौरा चयन हुइल बटै कलेसे पाछे दुई जनहनहे मनोनित कैना जनाइल बा ।