कानून कार्यान्वयन फितलो हुइबेर हिंसा प्रभावित न्यायसे बञ्चित
पहुरा समाचारदाता
धनगढी, ३ जेठ । कानून कार्यान्वयन फितलो हुइबेर हिंसा प्रभावित न्यायसे बञ्चित हुइटी रहल एक कार्यक्रमके सहभागीहुक्रे बटैले बटै ।
महिला मानव अधिकार रक्षकहरुको राष्ट्रिय संञ्जालके आयोजनामे ओरेक नेपाल कैलाली ओ दलित महिला अधिकार मञ्च कैलालीके सहकार्यमे बुधके रोज धनगढीमे हुइल ‘हिंसा प्रभावितहुकनके न्यायमे सहज पहुँच ओ प्रभावितहुकनके सवाल सम्बोधनके लाग न्यायिक निकाय ओ पत्रकारहुकनके भूमिका विषयक अन्तरक्रिया कार्यक्रममे सहभागीहुक्रे उ बाट बत्वाइल हुइट ।
इन्सेक प्रदेश संयोजक खडकराज जोशी हिंसा प्रभावितहुकनके न्यायमे सहज पहुँच ओ प्रभावितहुकनके सवाल सम्बोधनके लाग कानून कार्यान्वयनसंगे पीडिहे न्याय डेहुवाइक लाग समन्वय करके जैना जरुरी रहल बटैलै ।
उहाँ कहलै, कतिपय ठाउँमे पीडितके मुद्दा दर्ता नइहुइना, मुद्दाहे होस्टाइल कराइक लाग राजनितिक दवाब आइल कारण हिंसा प्रभावित न्यायसे बञ्चित हुइठै, यकर लाग सरोकारवाला निकाय समन्वय जैना आवश्यक बा ।’
राष्ट्रिय मानव अधिकार आयोगके प्रदेश प्रमुख हरि प्रसाद ज्ञवाली सामाजिक अपराध करुइया ओ हिंसा प्रभावित कानूनबारे पत्ता नइहुइल कारण टमान जैसिन घटना बह्रल बटैलै । हिंसा प्रभावितके पक्षमे न्याय नइहुईबेर हिंसाके दोह्रराइल बटै ।
बार कैलालीके अध्यक्ष इन्द्रप्रसाद लेखक हिंसा प्रभावितके आर्थिक अवस्था कम्जोर रहुइयाके लाग निशुल्क कानूनी परामर्शके व्यवस्था रहल बटैलै । ढेर जैसिन महिला न्यायमे परल मने कुछ संख्यामे पुरुषफे न्यायमे परल उहाँ बटैलै ।
सरकारी वकिल कार्यालयके राजेन्द्र भण्डारी टमान जैसिन पीडितसे मुद्दा दर्ता कैके फेरसे मुद्दा फिर्ता लेहल बटैलै । मानव अधिकारकर्मी गोमा आचार्य सरकारी तुटिके कारण सर्वसाधारणसे दुःख पैटी रहल बटैली । उहाँ कहली, जिल्ला प्रशासन कार्यालयमे नागरिकता बनाईबेर नाउँ थर लिख्नामे तुटिहुईबेर सर्वसाधार।ण दुःख पाइल ओ सेवाग्राहीके सरकारी निकायप्रति विश्वास घटल बटैली ।
पत्रकार उन्ननी चौधरी हिंसा प्रभावितके मुद्दा दर्ता कैना सकस हुइल बटैली । दर्ता हुइल मुद्दा फिर्ताके लाग दवाव डेना, पीडितहे प्रलोभनमे पारके मुद्दा होस्टाइल करैना जैसिन कार्य हुइल उहाँ बटैली ।
महिला मानव अधिकार रक्षकहरुको राष्ट्रिय संञ्जालके अध्यक्ष अम्विका भण्डारीके अध्यक्षतामे हुइल कार्यक्रममे सहजीकरण ओरेक कैलालीके वरिष्ठ कार्यक्रम अधिकृत गीता चौधरी करल रहिट ।
ओस्टेक करके दलित महिला अधिकार मञ्च कैलालीके अध्यक्ष सावित्रा घिमिरे हिंसा प्रभावितहुकनके न्यायमे सहज पहुँच ओ प्रभावितहुकनके सवालबारे कार्यपत्र प्रस्तुत करल रहिट । कार्यपत्र प्रस्तुत करटी उहाँ हिंसा प्रभावित महिला तथा बालबालिकाहुकनहे प्रभावकारी सेवा प्रवाहके लाग साझा सवालमे साझा बुझाईके वातावरण तयार कैना आवश्यक रहल बटैली । ओस्टेक हिंसा प्रभावितके अवस्थाबारेफे उहाँ जानकारी डेहल रहिट ।
