शिक्षकहुकनहे बिटिसी स्काउट तालिम

पहुरा समाचारदाता
धनगढी, १२ जेठ । धनगढीमे नेपाल स्काउट शिक्षकहुकनहे ५५४ औँ बिटिसी (पुरूष) स्काउट आधारभूत आवासीय तालिम डेले बा ।

धनगढी उपमहानगरपालिकाके आर्थिक सहयोगमे २८ विद्यालयके २८ जाने शिक्षकहे बिटिसी स्काउट आधारभूत तालिम डेहल स्काउटके सुदूरपश्चिम प्रदेश सहायक राजेन्द्र बानियाँ जानकारी डेलैं ।

उहाँक अनुसार जेठ ७ गतेसे सञ्चालन हुइल तालिमके शुकके रोज समापन हुइल बा । तालिम धनगढी उपमहानगरपालिका–७, देवहरीयास्थित शिव माध्यमिक विद्यालयमे हुइल रहे ।

नेपाल स्काउट धनगढीके संयोजक रामचन्द्र जोशी ५ रात, ६ दिनसम चलल तालिममे सहभागी शिक्षकहुक्रे विद्यालयमे स्काउट ट्रुप सञ्चालन करना बटैलैं । उहाँक अनुसार शिक्षकहुक्रे हप्ताके प्रत्येक शुकके रोज स्काउट ट्रुप करहि । प्रत्येक विद्यालयसे १२ से ३२ जानेक समूह बनाके तालिम डेहे सेक्जाइठ ।