मानवाधिकार संरक्षणके लाग एकजुट आवश्यक
पहुरा समाचारदात
धनगढी, १२ बैशाख । सुदूरपश्चिम प्रदेशके आन्तरिक मामिला तथा कानुनमन्त्री पृथ्वीबहादुर सिंह मानवाधिकार संरक्षणके लाग एकजुट हुइना आवश्यक रहल बटैले बाटै ।
राष्ट्रिय मानवाअधिकार आयोगके २३औं वार्षिकोत्सवके अवसरमे शुकके धनगढीमे आयोजित जलपान समारोहे सम्बोधन कैटी मन्त्री सिंह प्रदेशमे मानवाधिकार उलंघनके घटना दिनप्रति दिन बह्रटी गैल ओरसे सक्कु सरोकारवाला निकायसे उहीहे न्यूनीकरण ओ मानव अधिकार संरक्षणके लाग एकजुट हुइना आवश्यक रहल औंल्याइल हुइट ।
‘यहाँ जनचेतनाके अभाव, अशिक्षा ओ टमान कुप्रथाके कारण मानवाधिकार उलंघनके घटना दिनप्रति दिन घट्नाके साथे बह्रटी फेन रहल बा’, मन्त्री सिंह कहलै–‘प्रदेशमे रहल टमान मेरिक कुप्रथा छुवाछुट, बोक्सी प्रथासे पीडितहे न्यायके लाग लाग सक्कु सरोकारवाला निकाय एकजुट हुइना आवश्यक रहल बा ।’
मन्त्री सिंह यहाँ स्थित मानव अधिकारकर्मी, संघसंस्था लगायत सरोकारवाला निकायसे सल्लाह सुझावके अपेक्षा कैटी सक्कु सरोकारवाला निकायसे समन्वय सहकार्य कैटी मानव अधिकार संरक्षणके लाग प्रतिवद्धता समेत व्यक्त करल रहिट ।
कार्यक्रममे मावन अधिकार आयोग सुदूरपश्चिम प्रदेश कार्यालय प्रमुख हरिज्ञवाली सुदूरपश्चिम प्रदेशके मानव अधिकारके बारेम जानकारी कराइल रहिट । उहाँ प्रदेशमे शिक्षा, स्वास्थ्य, रोजगारी, खाद्यान्न लगायतके अवस्था दयनीय रहल बटाइल रहिट ।
जिल्ला समन्वय समिति कैलालीके उपप्रमुख खगराज भुषाल मानव अधिकार हनन्के घट्ना हुइ नैडेहक लाग सक्कु जाने जिम्मेवार ओ सचेत हुइना आवश्यक रहल बटाइल रहिट ।
दलित महिला अधिकार मञ्च कैलालीके अध्यक्ष सावित्रा घिमिरे व्यक्ति समुदायमे आभिन फेन छुवाछुटके भावना रहल बटैली । उहीहे हटाइक लाग उहाँ व्यक्तिके सोचाइमे परिवर्तना लन्ना जरुरी रहल बटैली ।
नेपाल पत्रकार महासंघ सुदूरपश्चिम प्रदेशके सचिव हरि जोशी मानव अधिकार संरक्षणके लाग यहाँके मानव अधिकारके क्षेत्रमे कार्यरत संघसंस्था, सरोकारवाला निकायसे समन्वय सहकार्य कैके आघे बह्रना प्रतिवद्ध रहल बटाइल रहिट ।
कार्यक्रम मानव अधिकार आयोग सुदूरपश्चिम प्रदेश धनगढीके आयोजनामे हुइल रहे । कार्यक्रममे यहाँ स्थित टमान सरकारी तथा गैरसरकारी संघसंस्था, मानव अधिकारकर्मी, सरोकारवाला निकायके प्रतिनीधी, संचारकर्मीहुक्रनके उपस्थिति रहल रहे ।
