युपीआरके अध्यावधिक समीक्षा सम्बन्धी प्रदेशस्तरीय परामर्श कार्यक्रम
पहुरा समाचारदाता
धनगढी, १७ जेठ । मानव अधिकारके विश्वव्यापी आवधिक समीक्षा (युपीआर) के अध्यावधिक समिक्षा सम्बन्धी प्रदेशस्तरीय परामर्श कार्यक्रम बुधके रोज धनगढीमे निम्जल बा ।
अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय, धनगढी ओ लुथरन विश्व फेडरेशनके संयुक्त आयोजनामे हुइल कार्यक्रममे इन्सेक प्रदेश संयोजक खडकराज जोशी मुक्त कमैया, मुक्त हलिया, मुक्त कम्लहरी, अपाङ्गता हुइल नागरिक, महिला, यौनिक तथा लैङ्गिक अल्पसंख्यक, दलित तथा सीमान्तकृत समुदायके मानव अधिकारके अवस्थाबारे छलफल आवश्यक रहल बटैले बटै ।
इन्सेक केन्दीय कार्यालयके लवि तथा एडभोकेसी महाशाखाके प्रमुख सम्झा श्रेष्ठ संयुक्त राष्ट्र महासभासे पारित करल नौ ठो भारी महासन्धी मध्ये सात महासन्धीहे नेपाल सरकारसे अनुमोदन करके कानून कार्यान्वयन कैना प्रतिबद्धताके आधारमे राज्यसे पुरा करे नइसेकल मानव अधिकारके सवालमे अनुगमन करके साथे चार वर्षके अवधीमे संघसंस्थाके ओरसे संयुक्त राष्ट्र संघमे डेना मध्यावधी छाया प्रतिवेदनके तयारी प्रक्रियामे रहल ओरसे छलफल आवश्यक रहल बटैली ।
राष्ट्रिय मानव अधिकार आयोगके प्रमुख हरी प्रसाद ज्ञवाली प्रदेश तथा स्थानीय सरकार मुक्त कमैया, मुक्त हलिया, मुक्त कम्लहरी, अपाङ्गता हुइल नागरिकहुकनके मानवअधिकारप्रति गम्भीर नइरहल अवस्थामे सक्कु संघसंस्था मिलके दवाव डेना आग्रह करलै ।
सुदूरपश्चिम समाजके पुष्पराज पुनमगरसे यौनिक तथा लैङ्गिक अल्पसंख्यक समुदायके समलिङ्गी भोजहे राज्यसे मन्यता नइडेहेबेर टमान समस्या भोग्टी रहल बटैलै ।
एडभोकेसी फोरमके संयोजक पुष्प विक्रम शाही कानूनके कार्यान्वयन नइहुके सामाजिक विभेद तथा जातिय वभेद कायमे रहल ओरसे राष्ट्रिय मानव अधिकार आयोगसे सकृय हुके अनुगमन करे पर्ना बटैलै ।
जानकी लावडसे कमैया ओ हलिया मुक्त करल वर्षौ विटसेलेसेफे राज्यके उदासिनतासे पुनस्र्थापना हुई नइसेकल गुनासो करलै ।
मुक्त कमैया महिला विकास मंचके कौशिला चौधरी पहिचान करल मुक्त कमैयाहुकनहे पुनस्र्थापना करे नइसेकल ओ कम्लहरीहुकनहे उच्च शिक्षासमके निःशुल्क ओ रोजगारीके व्यवस्था हुई पर्ना बटैली ।
फेडोके सविना सुनार कानूनी रुपमे अन्तर जातिय भोजहे मान्यता डेलेसेफे व्यवहारिक रुपमे समाजसे अभिनफे स्वीकार करे नइसेकलपाछे जातीय विभेद कायमे रहल बटैली ।
गैरसरकारी संस्था महासंघके लोकमान धामी राज्यसे मौलिक हकहे कार्यान्वयन करे नइकसेकल ओरसे नागरिकहुक्रे शिक्षा, स्वास्थ्य, रोजगार तथा आवाससे बञ्चित हुइटी आइल बटैलै ।
राष्ट्रिय अपांगत महासंघ प्रदेश महासचिव नन्दराज भट्ट अपाङगता हुइल नागरिक टमान समस्यामे रहट रहटीफे अपाङगता हुइल नागरिकहुकनके लाग नीति तथा कार्यक्रम कार्यान्वयन करे नइसेक्के हरेक वर्ष वजेट फ्रिज हुइना करल गुनासो करलै ।
जिल्ला बार एशोसियशनके कृष्णप्रसाद सुवेदी उच्च अदालतके व्यवस्थापन नइहुके पीडितहुक्रे सर्वसुलभ न्यायसे बञ्चित हुई पर्ना अवस्थामे राज्यसे नीतिगत सुधार करे पर्ना बटैलै ।
बासुदेव चौधरी इट्टा भटठामे मजदुरी कैना श्रमिकहुकनके बालबालिका शिक्षासे बञ्चित हुइनाके साथे बालश्रममे पर्ना करल ओरसे स्थानीय सरकारसे रोजगारके व्यवस्था करे पर्ना बटैलै ।
इन्सेक केन्दीय कार्यालयके लवि तथा एडभोकेसी महाशाखाके प्रमुख सम्झा श्रेष्ठसे मध्यावधि प्रतिवेदनमे आइल सुझावके कार्यान्वयनके अवस्था ओ मुक्त हलियाहुकनके आर्थिक, सामाजिक तथा संस्कृतिक अधिकारबारे करल अनुसन्धानके प्रस्तुतीकारण राष्ट्रिय मुक्तहलिया महासंघके अधिकृत हरिसिंह बोहरा करल रहिट ।
–
–
