थारु म्युजिक भिडियो ‘निन्द नइ लग्ना’ सार्वजनिक
पहुरा समाचारदाता
धनगढी, १९ जेठ । सुलभ फिल्मस् प्रालिसे लावा थारु म्युजिक भिडियो सार्वजनिक करले बा ।
‘निन्द नइ लग्ना’ कना बोलके गीतके म्युजिक भिडियोमे मोडल जगत गुरु ओ सामु चौधरीके मुख्य भूमिका रहल बा । शब्द संगीत उमेश मुस्कानके रहल गीतमे चर्चित गायिका अन्नु चौधरी ओ उमेश मुस्कानके स्वर रहल बा । म्युजिक भिडियोके डाइरेक्सन आर्दश महतोके रहल बा । ओस्टके क्यामेरा ओ एडिट दया चौधरीके रहल बा ।
ओहेबिच प्रालिसे धनगढीमे भिडियो रिलिज सेरेमनीके आयोजना करल रहे । प्रालिके प्रवन्ध निर्देशक दया चौधरीके अध्यक्षतामे हइल कार्यक्रमके बर्का पहुना राष्ट्रिय थारु कलाकार मञ्च सुदूरपश्चिमके अध्यक्ष संगत थारु रहल रहिट । थारु मेगा स्टार समेत रहल थारु लावा थारु म्युजिक भिडियो अइना कहलक थारु समुदायके लाग एकदमे मजा रहल बटैलै । उहाँ थारु म्युजिक भिडियोसे थारु कला संस्कृति संरक्षणमे समेत टेवा पुग्ना बटैलै ।
एक औरे प्रसङ्गमे उहाँ थारु गायक तथा संगीतकारहुक्रनसे म्युजिक भिडियोमे लगानी करुइया लगानीकर्ता पीडित रहल बटैलै । उहाँ गायक तथा संगीतकारहुक्रे अडियोके व्यापार समेत करल आरोप लगैलै ।
उहाँ कहलै‘–हम्रे म्युजिक भिडियो निर्माताहुक्रे गायक तथा संगीतकारहुक्रनसे लाखौँ लगाके गीत(अडियो) किन्ठी, आभिन ओम्हे लाखौँ लगानी कैके म्युजिक भिडियो निर्माण करठी । मने गायक तथा संगीतकारहुक्रे उहे गीतहे डिजिटल प्लेटफर्ममे आपन नाउँमे दर्ता करैठै । जिहीसे हमार निर्माण करल भिडियोमे कपिराइट अइनाके साथे हम्रे लगानी कर्ताहुक्रनके लगानी नै डुबठ् ।’
कार्यक्रममे सुप कला प्रतिष्ठानके महासचिव गुणाकर पनेरु, वरिष्ठ द्वन्द निर्देशक उदयसिंह बोहरा, निर्देशक राजकुमार श्रेष्ठ, सुपक थारु सलिमा पहुराके प्रवन्धक गोविन्द मुखिया, कलाकारहुक्रनके उपस्थिति रहल रहे । कार्यक्रमके सञ्चालन थारु लोक गायक राजु राज चौधरी करल रहिट ।
