कैलारी–४ मे योजना प्राथमिकीकरण ओ प्रगति विवरण समिक्षा
पहुरा समाचारदाता
हसुलिया, १९ जेठ । कैलाली जिल्लाके कैलारी गाउँपालिका वडा नम्बर ४ मे शुकके रोज वडा भेला कार्यक्रम हुइल बा ।
उ कार्यक्रममे चालु आर्थिक वर्षके प्रगति विवरण समिक्षा ओ अइना आर्थिक बर्षके लाग योजना प्राथमिकीकरणबारे छलफल ओ सुझाव संकलन हुइल हो । वडा अध्यक्ष ठागुराम चौधरीके अध्यक्षतामे हुइल कार्यक्रममे वडा सचिव श्रीप्रसाद चौधरी आर्थिक बर्ष २०७९÷२०८० सालके प्रगति विवरण प्रस्तुत करल रहिट ।
चालु आर्थिक बर्षमे वडा भिटर जम्मा २१ ठो योजना रहल १५ ठो योजनाके काम सम्पन्न हुइल ओ ६ ठो निर्माणधिन अवस्थामे रहल उहाँ बटैलै । चालु आर्थिक बर्षके सावनसे जेठ १७ गतेसम वडा नम्बर ४ भिटर टमान शिर्षकमे ७ लाख १९ हजार ५०३ रुप्या ९५ पैसा राजश्व संकलन हुइल बा ।
चालु आ.व भिटर अब्बेसम व्यतिगत घटना दर्ता अन्तर्गत १५६ जानेक जलम दर्ता, मृत्यु दर्ता ४० जाने, विवाह दर्ता ५७ जोडीके बसाईसराईमे सरके औरे ओर गैल २० जाने ओ आइल १५ जाने रहल बटै । जिल्ला अदालतके फैसला अनुसार वडामे दर्ता हुइल संख्या ३ जोडीके रहल बा ।
नागरिकताके लाग सिफारिस १३६ जानेक, नागरिकताके प्रतिलिपि ८६ जाने रहल बटै । चालु आर्थिक बर्षके लाग सामाजिक सुरक्षाके लाग दर्ता संख्या भत्ता १ सय १ जाने रहल बटै ।
कार्यक्रममे मन्तव्य कार्यपालिका सदस्य लालबहादुर विक, भल्मन्सा तिर्थ प्रसाद नेपाल, नेपाली काँग्रेसके ओरसे सजमान चौधरी, नेकपा एमालेके कलेशु राम चौधरीलगायत मन्तव्य व्यक्त करल रहिट । स्वागत मन्तव्य वडा सदस्य मोहनलाल चौधरी व्यक्त करल रहिट ।
ओस्टेक आर्थिक बर्ष २०८०÷२०८१ सालके लाग बस्तीसे माग फारम भरके आइल योजनाबारे छलफल करके प्राथामिकीकरणके आधारमे आघे बह्रैना कहल बा । अइना बर्षमे का कैसिन योजना समेटना वडा भेलासे सुझाव डेहल बा ।
वडा भेलामे वडा सदस्य हरिद्वारी चौधरी, लक्ष्मी चौधरी, सुवा परियार गाउँक बुद्धिजीवी, राजनितिक टमान राजनितिक दलके प्रतिनिधि, भल्मन्सा ओ स्थानीयबासीहुकनके सहभागिता रहल रहे ।
