लहङ्गा/अङ्ग्या कटाई–कढाई–सिलाई तालिम निम्जल

पहुरा समाचारदाता
भजनी, २० जेठ । कैलालीके जानकी गाउँपालिका वडा नम्बर ४, कञ्चनपुरमे १ महिने थारु लहङ्गा/अङ्ग्या कटाई–कढाई–सिलाई तालिम निम्जल बा । तालिका वैशाख १६ गतेसे जेठ १४ गतेसम सञ्चालन हुइल रहे ।

‘अमूर्त साँस्कृतिक सम्पदा परम्परागत कलाकौशलः पुस्तान्तरण ओ बजारीकरणसे संरक्षण, संवद्र्धन, प्रवद्र्धनः हमारे अभियान’ कना नारासहित दाङ हस्तकलाके आयोजना तथा स्किल अप नेपाल हस्तकला महासंघ, काठमाडौंके प्रायोजनमे हुइल तालिममे पालिकके टमान ठाउके महिलाहुकनके सहभागिता रहे ।

कार्यक्रमके घरगोसिया हस्तकलाके कैलाली जिल्ला संयोजक राधा कठरिया थारु लहङ्गा/अङ्ग्या हेरैलेसे थारु समुदायके थारु समुदायके अस्तित्व हेरैना बटैलैं । उहाँ अपन पहिचान बचाइक लाग टमान उटारचढाव आइसेकठ मने पहिचान बचैना एकठो माध्यम लहङ्गा/अङ्ग्या रहल बटैलैं ।

कार्यक्रमके बर्का पहुना जानकी गाउँपालिका वडा नम्बर ८ के वडाध्यक्ष दीपेन्द्र कठरिया संस्कृति बचाइक लाग लहङ्गा÷अङ्ग्याहे संरक्षण, सम्वद्र्धन प्रवद्र्धन करना आवश्यक रहल बटैलैं । उहाँ अइना आर्थिक वर्षमे लहङ्गा/अङ्ग्यालगायतके सांस्कृतिक संरक्षणके लाग बजेटके व्यवस्थापन कैना बटैलैं ।

अस्टेक, कार्यक्रममे केओटी युनिभरसिटी टोकियो जापानके मानवशास्त्री टासुनो फाजिकुरा विदेशमे लहङ्गा/अङ्ग्याके बहुट महत्व रहल बटैलैं । उहाँ वश्चिमा संस्कृतिमे लहङ्गा/अङ्ग्याके माग ढेर रहल फेन बटैलैं । अइसिन मजा संस्कृतिके सहि पहचिान खोजेक लाग नेपाल आइल उहाँ बटैलैं ।

कार्यक्रममे अगुवा गुरुवा मोहनलाल गुरुवा (भर्रा) लहङ्गा/अङ्ग्याके सँगे गुरुवाके चलन फेन हेरैटिरहल ओरसे गुरुवाके संस्कृतिके फेन संरक्षण करेपरना मे जोड डेलैं । मानवअधिकार सचेतना तथा सामाजिक विकास केन्द्रके सचिव सोहनलाल कठरिया भाषा, संस्कृति, पहिचान, चालचलान जेगाइक लाग लहङ्गा/अङ्ग्याहे जोगाइ परना बटैलैं ।

दाङ हस्तकला दाङके जिल्ला अध्यक्ष अशोक थारू अइसिन सीप ज्ञान लावा पुस्तामे नन्ना जरुरी रहल बटैलैं । उहाँ लहङ्गा/अङ्ग्या, चोलियाहे मूर्त रूप डेहेक लाग छोट्टेसे आइन कला संस्कृतिमे लागे परना बटैलैं । थारू फिल्म कलाकार तथा अभिनेता तेज जंग कलाकारितामे काम करेबेर सबसे सुहवान थारु लहङ्गा÷अङ्ग्या, फरिया रहल बटैलैं । उहाँ यकर संरक्षणके लाग शिक्षाके आवश्यकता रहल फेन बटैलैं ।

गाउँक बरघर कलावती कठरिया लहङ्गा, चोलिया, अङ्ग्याहे बचाइहस महिलाहुकनके बरघर पद फेन बचाइ परना बटैलैं । उ अवसरमे तालिममे सहभागीहुकनहे प्रमाणपत्र फेन वितरण करल रहे । कार्यक्रमके सञ्चालन पहुरा थारु दैनिकके संवाददाता जीवनकुमार चौधरी करले रहैं ।