विपद व्यवस्थापन सम्बन्धी अन्तरक्रिया

पहुरा समाचारदाता
हसुलिया, २१ जेठ । कैलारी गाउँपालिकाके जनप्रतिनिधिहुकनके विपद व्यवस्थापन सम्बन्धी अन्तरक्रिया कार्यक्रम कैगिल बा ।

कैलारी गाउँपालिकाके समन्वय तथा नेपाल रेडक्रस सोसाइटीके आयोजनामे गाउँपालिका अध्यक्ष राजसमझ चौधरीके वडका पहुना तथा उपाध्यक्ष भगवतीकुमारी चौधरीके विशिष्ट पहुनामे अन्तरक्रिया कार्यक्रम हुइल हो । कार्यक्रममे बोल्टी गाउँपालिका अध्यक्ष कैलारी विपदके दुष्टिकोणसे अतिजोखिममे रहल बटैलै । उहाँ कहलै, बर्खायामके समय आइटा यहाँके लडियामे अइना बाढ, कटान डुबानसे भारी क्षति हुइटी गैल बा । पालिकामे रहल सीमित स्रोत साधनसे समस्या समाधान कैना कठिनाई हुइल बा । यकर लाग प्रदेश ओ संघके समन्वय करटी रहल बा ।’

कार्यक्रममे गाउँपालिका उपाध्यक्ष भगवती कुमारी चौधरी विपद व्यवस्थापनके लाग सक्कु जानेक समन्वय आवश्यक रहल बटैली । कार्यक्रममे वडा नम्बर ४ के वडा अध्यक्ष ठागुराम चौधरी विपदसे हुइना जोखिम न्यूनिकरणके लाग केन्द्रमे डेलिगेसनफे गैल बटैलै । यहाँफे विपद जोखिम न्यूनिकरण समिति रहल ओ तालिमफे डेहल उहाँ बटैलै ।