थारु लेहेंगाहे व्यावसायिकरणमे जोड

पहुरा समाचारदाता
हसुलिया, २१ जेठ । कैलाली जिल्ला कैलारी गाउँपालिका महिला तथा बालबालिका शाखाके आर्थिक सहयोगमे महिलाहुनके आयआर्जनके लाग सीप विकास कार्यक्रम अन्र्तगत १८ जाने महिलाहुकनहे थारु लेहेंगा तालिम डेजैटी रहल बा ।

एक वडासे दुई जाने करके नौ वडाके १८ जाने महिला थारु लेहेंगा सिल्ना तालिम लेटी रहल बटै । लोप हुइना अवस्थामे रहल मने लोक प्रियताभर बह्रटी गैल ओरसे संरक्षण प्रवद्र्धनके लाग लेहेंगा सिल्ना तालिम हो । दुई महिनाके लाग संचालन हुइल तालिम गाउँपालिकाके उपाध्यक्ष भगवतीकुमारी चौधरी नेतृत्वके पालिका स्तरीय अनुगमन टोलीसे अँटवारके रोज तालिमके अनुगमन कैगिल बा ।

तालिमके अनुगमन कैटी गाउँपालिका उपाध्यक्ष भगवतीकुमारी चौधरी एक ओर थारु पहिरन हेरटी गैल, दुसर ओर यकर लोकप्रियता बह्रल बटैली । उहाँ कहली, थारु डिडी बाबुनके मुख्य पहिरन कलेक लेहेंगा ओ अंग्या हो । मुलुकमे परिवर्तनसंगे परम्परागत संस्कृति, पहिरनफे हेरैना अवस्थामे बा, मने फेरसे यकर लोकप्रियता बह्रल महशुस कैगिल बा संरक्षणसंगे व्यावसायिक करण कैलेसे आर्थिक स्रोतमे बृद्धि करे सेक्जाई ।’

उहाँ कहली, ‘परम्पगत पहिरन हेरैलेसे टरटिहुवार, भोजकाजमे घलेक लाग हरेक डिडी बाबुनहे एक जोर थारु लेहेंगा हुइ परल । थारु पहिरनमे गर्व बा । पहिचान जोरल बा । हरेक ठाउँमे यकर माग बह्रटी गैल आरसे यरक संरक्षण सम्वद्र्धन करटी महिला डिडीबाबु व्यावसायिकरण ओर बह्रटी आयआर्जन बह्राई परल ।’

वडा नम्बर ५ के वडा अध्यक्ष विष्णुप्रसाद चौधरी संस्कृति संरक्षण कैना जरुरी रहल बटैलै । उहाँ कहलै, हमार संस्कृति, खानपान, पहिरन दिनदिने परिवर्तन हुके मौलिक खाना, परम्परागत संस्कृतिउप्पर प्रहार हुइटा । यिहीहे जोगाइक लाग यूवा पुस्ता अग्रसरता डेखाई परल ।

कैलारी गाउँपालिका योजना शाखाके प्रमुख सन्तोषकुमार चौधरी थारु लेहेंगा तालिमके लाग चार लाख रुप्या बजेट विनियोजन करल बटैलै । यी तालिम चैत २५ से सुरु हुके जेठ २५ गते समापन हुइटी रहल बा ।

ओस्टेक करके वडा नम्बर ५ मे गरिवी निवारणका लागि लघु उद्यम विकास कार्यक्रम अन्र्तगत लेवल एक–सिलाई कटाई तालिमके अनुगमन कैगिल बा । यकर लाग बजेट ३ लाख ४२ हजार रुप्या विनियोजन हुइल योजना शाखाके प्रमुख बटैलै । ओस्टेक करके कैलाली गाउँपालिका वडा नम्बर ४ के २० लाख रुप्याके भवन निर्माणके अनुगमन कैगिल बा । कलेसे वडा नम्बर ४ स्थित जनकल्याण माविके भवन मर्मतके अनुगमन करल बा ।

अनुगमनमे पालिका स्तरीय अनुगमन टोलीके संयोजक भगवतीकुमारी चौधरी, पूर्वाधार विकास समिति संयोजक प्रेम बहादुर चौधरी, आर्थिक विकास समिति संयोजक विष्णु प्रसाद चौधरी, कार्यपालिका सदस्य टिका चौधरीभुल, योजना शाखा प्रमुख सन्तोषकुमार चौधरी, प्राविधिक हिमाल कुश्मीके उपस्थिति रहे ।