सामुदायिक विद्यालय कर्मचारी चार दिनसे धर्नामे
पहुरा समाचारदाता
धनगढी, २४ जेठ । सामुदायिक नेपाल विद्यालय कर्मचारीहुक्रे अपन माग मुद्दासहित चार दिनसे शिक्षा विकास तथा समन्वय इकाई कैलालीमे निरन्तर धर्नामे डेले बटै ।
नेपाल विद्यालय कर्मचारी परिषदके आयोजनामे चार दिनसे देशभर धर्नामे रहल परिषद कैलाली जिल्लाके कार्यवाहक अध्यक्ष तेजराम चौधरी बटैलै । सामुदायिक विद्यालयमे कार्यरत कर्मचारी २०४६ सालसे आन्दोदनमे रहल बटी,’ उहाँ कहलै, महंगी उच्च चरणमे पुगसेकल बा । मने हम्रहिन सरकार न्यून ज्याला देहेफे नइसेक्ले हो । कार्यालय सहयोगीहे संघ सरकारसे आठ हजार ओ स्थानीय सरकारस सात हजार तलब डेना कहल बा । कैलालीके हकमे कौनो कौनो स्थानीय सरकार ओटराफे डेहे नइसेकल हो ।’
कैलारीके चुरे गाउँपालिका अभिन ओटरा नइपाइल अवस्था बा, कार्यवाहक अध्यक्ष कहलै । प्रत्येक बरसके नीति कार्यक्रम ओ बजेट अइनासे पहिले दवाब डेटी बटी । उहाँ कहलै, विगतसे दरबन्दीके माग उठैटी आइल आगिल बा । संघीय शिक्षा ऐन लागु हुइ परल कहिके सरकारहे दवाब डेना कैजाइठ मने बजेट भाषणमे सुनुवाई हुइल नइहो ।
अध्यक्ष कहलै, ‘आर्थिक वर्ष २०८०÷०८१ के बजेटमे नीति तथा कार्यक्रममे अर्थमन्त्रीसे सामुदायिक नेपाल विद्यालयके सक्कु कर्मचारी, बाल कक्षा शिक्षिकाहे पुरा सुविधा डेना कहले रहिट । नेपालके प्रचलित तलब डेना घोषणा करल रहे । सात दिनपाछे आइल बजेट बक्तव्यमे सामुदायिक नेपाल विद्यालय कर्मचारीके नाउ निशान नइआइलपाछे आन्दोलित हुई परल बा ।’
नीति तथा कार्यक्रममे सम्बोधन कैना मने बजेट नानेबेर धोखा डेना हुइलपाछे यिहे जेठ २० गतेसे २६ गतेसम देश व्यापि रुपमे आन्दोलित हुइल उहाँ बटैलै ।
नेपाल सरकारसे माग मुद्दामे सुनुवाई नइहुइलेसे काठमाण्डौ केन्द्रीत आन्दोलन कैना ओ २७ गतेसे असार १ गतेसम्म भद्रकाली काठमाण्डौं, माइती मण्डलामे रिले अनशन, धर्ना डेनाफे अध्यक्ष बटैलै ।
फेरसे कौनो सम्बोधन नइहुइलेसे असारके २ गतेसे अनिश्चितकालिन सामुदायिक विद्यालय बन्द कैना कार्यक्रमफे रहल उहाँ जनैलै । माग सुनुवाई नइहुइटसम विद्यालयमे नइलौटना कहिके निकरल उहाँ जनैलै । अपन माग मुद्दा जबसम सम्बोधन नइहुई टबसम सघर्ष जारी रख्ना उहाँ बटैलै ।
