कैलारी–७ रामपुरमे दुना टपरी उद्योग उदघाटन

पहुरा समाचारदाता
हसुलिया, २५ जेठ । कैलालीके कैलारी गाउँपालिका वडा नम्बर ७ रामपुरमे दुना टपरी तथा हस्ताकला उद्योगके उदघाटन हुइल बा ।

प्लाष्टिकसे बन्ना दुना टपरीहे निरुत्साहित करटी स्थानीय कच्चा पदार्थहे प्रयोगमे नानेक लाग गाउँपालिकाके आर्थिक सहयोगमे दुना टपरी उद्योगके विफेक रोज विधिवत रुपमे उदघाटन हुइल बा । गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम उ उद्योगके उदघाटन करल रहिट ।

उद्योगके उदघाटन करटी उहाँ कहलै, ‘रामपुर गाउँ बनुनासे जोरल बा । यी उद्योगके लाग चाहल कच्च पदार्थ कलेक पटिया हो । यहाँ जटरा पटिया उपलब्ध बा । खाली खेर जइना पटियाके सदुपयोग करके आर्थिक आम्दानी ओ रोजगारी सृजना करे सेक्जाई ।’ यी उद्योगसे उत्पादन हुइल दुना टपरी स्थानीय गाउँठाउँमे भोज भटेर हुइबेर प्रयोग खपट करेसेक्ना अध्यक्ष बटैलै ।

वडा नम्बर ७ रामपुर निवासी गौरीकुमारी चौधरी, सावित्री चौधरी ओ टेकु घर्तीममगरक नाउँसे घरेलु तथा साना उद्योग कार्यालयम उ उद्योग दर्ता बा । यी उद्योगमे १९ जाने महिला आवद्ध रहल बटै । उद्योग संचालक गौरीकुमारी चौधरी महिला समुह खोलके ठोर टोरसे पैसा जम्मा कैके उद्योग दर्ता कराइल ओ गाउँपालिकासे आठ दिने तालिम, डोन टेपरी बनैना मेसिन सहयोग करलपाछे आज उद्योग संचालनमे नन्ना सफल हुइल बटैली । उहाँ कहली, हमार गाउँ बनुवक लग्गा बा, यहाँक पटिया ओस्टेहे खेर चलाजाइठ । हम्रे वडा कार्यालयसे तालिम मग्ली । तालिमपाछे उद्योग संचालन कैना कहल रल्ही । आज हमार सपना पुरा हुइल बा ।

अपन उद्योगसे तयार हुइलक टीना, चटपट खैना डोनियाक मोल ८० पैसा, प्लेट डोनाक मोल १ रुप्या ५० ओ भारी टेपरीके मोल ४ रुप्पा टोकल उहाँ बटैली ।

उद्योग उदघाटन कार्यक्रममे कार्यपालिका सदस्य सुन्दरीदेवी चौधरी, लघु उद्यम विकास शाखाके प्रमुख प्रदीप चौधरी, निर्मला चौधरी, वडा कार्यालयके कर्मचारीहुकनफे सहभागिता रहल रहे ।