स्वास्थ्य विज्ञान विश्वविद्यालय बनैना सरकार प्रतिवद्ध बाः भट्ट
पहुरा समाचारदाता
धनगढी, ३० जेठ । नेकपा माओवादी केन्द्र सुदूरपश्चिम प्रदेश संसदिय दलके नेता खगराज भट्ट संघीय सरकार गेटामे विश्वविद्यालयके विरुद्धमे ठरहयाइल कना बाट सत्य नइरहल बटैले बटै ।
नेकपा माओवादी केन्द्रके स्थाई समिति सदस्य तथा सुदूरपश्चिम प्रदेश इन्चार्ज समेत रहल भट्ट माओवादी केन्द्र सुदूरपश्चिम प्रदेश समितिसे आयोजना करल पत्रकार भेटघाट कार्यक्रममे बोल्टी संघीय सरकार पूर्ण रुपमे गेटामे विश्वविद्यालय निर्माणके लाग प्रतिवद्ध रहल ओरसे भ्रममे नइपर्ना आग्रह करलै ।
‘यी सरकारके प्रधानमन्त्री उहे हुइट जे इतिहासमे पहिल चो गेटामे विश्वविद्यालय घोषणा करल रहिट,’ उहाँ कहलै, ‘गेटामे विश्वविद्यालय बनाई परठ कहिके राष्ट्रिय राजनीतिक सहमति निर्माण करके उ आधारमे मन्त्रीपरिषदसे निर्णय करके विधयक बनाके नीति कार्यक्रमसमफे प्राथमिकतो धारके आघे बढैना बाट यिहे सरकारसे करल हो । टबमारे यी सरकारहे गेटामे विश्वविद्यालयके विरुद्धमे ठरहयाइल कहिके प्रचार कैन बाट सत्य नइहो ।’
उहाँ यी विषयहे राजनीतिक लाभ हानीके विषय बनैना प्रयास करल बटैलै । उहाँ बजेटमे अब्बे हुइल त्रुटी सच्यइना सरकार निष्ठापुर्वक लागल बटैलै । ‘सरकार बजेटमे हुइल त्रुटिहे सच्यइना प्रतिवद्ध बा । यिहीहे सच्याके विश्वविद्यालय बनाइक लाग निष्ठापुर्वक ठरहयाइल बा,’ उहाँ कहलै, ‘सदनमे अर्थमन्त्री फे बजेट १ अरब से ढेर छुट्याइल बटैले बटै । शिक्षा ओ स्वास्थ्यसे आइल फरक फरक शिर्षकके कारणसे समस्या पैदा हुइल हो । शिक्षाके आधारमे करल हुइलेसे विश्वविद्यालय हुइना रहे । मने, स्वास्थ्यके योजना लिपिवद्ध हुके प्रतिष्ठान हुई पुगल कना बाट बोल्ले बटै । यी बिषय सच्चि । सच्याजाई ।’
