स्वास्थ्य विज्ञान विश्वविद्यालयके लाग आन्दोलन चर्कल
सुदूरपश्चिम प्रदेशसभा घेराउ, प्रतिपक्षी दलके सांसदसे प्रदेशसभा बैठक बहिष्कार कैके आन्दोलनहे ऐक्यवद्धता
पहुरा समाचारदाता
धनगढी, ३० जेठ । कैलालीके गेटामे शहिद दशरथ चन्द राष्ट्रिय स्वास्थ्य विज्ञान विश्वविद्यालय बनैना माग करटी संघर्ष समितिसे सोम्मारके रोज सुुदूरपश्चिम प्रदेश सभा घेराउ कैगिल बा ।
गैल २९ माघ महिनामे मन्त्रिपरिषद् बैठकसे गेटामे शहिद दशरथ चन्द राष्ट्रिय स्वास्थ्य विज्ञान विश्वविद्यालय बनैना निर्णय करल रहे, मने १५ जेठके बजेटमे भर शहिद दशरथ चन्द राष्ट्रिय स्वास्थ्य विज्ञान प्रतिष्ठानके रुपमे आघे बढैटी एक सय शैयाके अस्पताल निर्माण कैना घोषणा करलपाछे ६ सय शैया अस्पतालसहित विश्वविद्यालय माग करटी एक अठुवारसे सुदूरपश्चिम प्रदेशमे आन्दोलन चर्कल बा ।
टमान चरणके आन्दोलन करटी अइलक सषर्घ समितिसे अँटवारके रोज एक दिन सुदूरपश्चिम प्रदेशमे आमहडताल कैले रहे । चरणबद्ध आन्दोलनके क्रममे सोम्मार प्रदेशसभा घेराउ कैलक संघर्ष समितिके संयोजक लोकराज पाण्डे (आगो) बटैलै ।
ओस्टेक सोम्मारके रोज प्रदेशसभा बैठक बहिष्कार कैटी प्रतिपक्षी दलक प्रदेशसभा सदस्यहुक्रे उ आन्दोलनप्रति ऐक्यवद्धता जनैले बटै । प्रदेशसभाके गेटमे हुुइलक आन्दोलन, कोषसभामे एमालेके प्रदेशसभा सदस्य तथा निवर्तमान मुख्यीमन्त्री राजेन्द्र रावल, राष्टिय प्रजातन्त्र पार्टीक प्रदेशसभा सदस्य खिमादेवी विष्ट सम्बोधन करटी सरकारसे सुदूरपश्चिम प्रदेशके जनतन भुक्यइना काम करटी आइल बटैलै ।
संघर्ष समितिके संयोजक लोकराज पाण्डे ६ सय शैयाके अस्पतालसहित गेटामे दशरथ चन्द राष्ट्रिय स्वास्थ्य विज्ञान विश्वविद्यालय संचालनके लाग विद्येयक नइनानटसम आन्दोलन जारी रहना उहाँ बटैलै । ओस्टेक करके चरणबद्ध आन्दोलनके कार्यक्रम आज मंगरके रोज प्रदेश प्रमुखके कार्यालय आघे साढे १० बजेसे धर्ना बैठना संघर्ष समिति जनैले बा ।
पर्वतराज जोशीसे प्रदेशसभा आघे एकल धर्ना
कैलालीके गोदावरी नगरपालिका–५ निवासी पर्वतराज जोशी गेटामे ६०० शैयासहितके शहिद दशरथचन्द स्वास्थ्य विज्ञान विश्वविद्यालय सञ्चालन कैना माग करटी प्रदेश सभाके मुलगेटमे एकल धर्ना डेले बटै ।
जोशी अक्केली हातमे प्लेकार्ड बोक्के दिनभर मौन धर्नामे बैठल रहिट । माग पुरा नइहुइटसमम कार्यालय
समयमे अनिश्चितकालिन धर्ना, धर्नाके समयमे खानपिन नइकैना, कुहीसे नइबोल्न, माग पुुरा नइहुइलेसे मृत्युहे सहजे स्विकर्ना समेतके कहाई लिखके धर्नामे बैठल बटै ।
गेटा मेडिकल कलेज विश्वविद्यालय बनैनामे द्विविधा नइहोः अर्थमन्त्री
अर्थमन्त्री डा. प्रकाशशरण महत गेटामे स्वास्थ्य विज्ञान प्रतिष्ठान नइहुके स्वास्थ्य विज्ञान विश्वविद्यालय बनैना बटैले बटै ।
नाम ज डेलेफे यी विश्वविद्यालय हुइल कहटी उहाँ अइना आर्थिक वर्षमे केल १ अर्ब १५ करोड बजेट सुनिश्चित करल जानकारी डेलै ।
सोम्मार प्रतिनिधिसभामे बजेटउप्पर उठल प्रश्नके जवाफ डेटी मन्त्री महत पूर्ण क्षमतामे विश्वविद्यालय चले कना सरकारके मनसय रहल बटैलै । चालु आर्थिक वर्षमे गेटामे शिक्षा ओ स्वास्थ्य मन्त्रालय दुनुसे बजेट छुट्याइलफे उहाँक कहाई बा ।
यकर ऐन निर्माणके क्रममे रहल कहटी उहाँ यम्ने जनताके भावना अनुसार विश्वविद्यालय नाम उल्लेख कैना प्रतिवद्धता रहलल बटैलै । बाट टे उहे हो, तबफे विश्वविद्यालय हुई परी कना भावनाहे नजरअन्दाज करे नइसेक्जाई । यकर ऐनफे आघे बह्रती बा, उ ऐनमे विश्वविद्यालय कहिके आइ, अर्थमन्त्री महत कहलै ।
मन्त्रिपरिषदसे गेटामे शहीद दशरथ चन्द स्वास्थ्य विज्ञान विश्वविद्यालय बनैना निर्णय कैनाके साथे सरकारके नीति तथा कार्यक्रममेफे परल रहे । मने आगामी आर्थिक वर्ष २०८०/०८१ के बजेटमे स्वास्थ्य विज्ञान प्रतिष्ठान कहिके आइलपाछे सुदूरपश्चिममे विरोध हुइटी रहल बा ।
गेटामे सुदूरपश्चिम स्वास्थ्य विज्ञान विश्वविद्यालय बनाई परीः महर
नेपाली काँग्रेसके केन्द्रीय सदस्य नैनसिह महर गेटा विश्व विद्यालयहे विश्व विद्यालयके रूपमे आघे बढाई पर्ना बटैले बटै ।
नेपाल प्रेस युनियन कैलालीके आयोजनामे करल पत्रकार सम्मेलनमे काँग्रेस केन्द्रीय सदस्य महर गेटा मेडिकल कलेजहे सञ्चालन करे सेक्लेसे नेपालके गौरवके विषय बन्न उहाँक धारणा रहे । यी गेटाके मेडिकल विश्व विद्यालयसे सुदूरपश्चिमके जनता केल नइहुके एक ठो मेडिकल पर्यटनमे विकास हुइना दाबी करलै ।
यी विश्व विद्यालयमे आसपासके प्रदेशके जनताके स्वास्थ्य अवस्था सुधरना, छिमेकी देश भारतसेफे पह्रे अइना, उपचार करे अइना मनैनके संख्याफे बढके यहाँके आर्थिक अवस्था ओ स्वास्थ अवस्थामे सुधार हुइना बटैलै । सुदूरपश्चिममे विश्वविद्यालय सञ्चालनका माग करटी आन्दोलन जारी रहल बेला यी आन्दोलनमे अपनफे समर्थन रहल उहाँ बटैलै ।
ढेर रोगके सामान्य उपचार हुइना हुइलेसेफे यहाँ विश्व विद्यालय हुइलेसे मेडिकल हव हुइना बटैलै । उहाँ कहलै विश्व विद्यालयके रुपमे विकास करे सेक्लेसे भर एक ओर मेडिकल शिक्षा पढे पैना दुसर ओर उपचार सेवा डेके टिचिङ अस्पतालके माध्यमसे सस्ता सेवा प्रवाह करके डाक्टरहुकनके आपूर्ति फे करे सेक्ना बटैलै ।
गेटामे हुइल मेडिकल कलेजहे विश्व विद्यालयके रूपमे विकास कैना सुदूरपश्चिमके और जिल्लामे रहल अस्पताल कञ्चनपुर ओ डडेल्धुराके अस्पतालहे मेडिकल कलेजहेफे द्रुत गतिमे आघे बढाई पर्ना बटैलै । सरकारसे बारम्वार सुदुरपश्चिमके जनताके स्वास्थ्यप्रति खेलवाड करटी रहल समेत उहाँक आरोप बा ।
गेटामे विज्ञान विश्वविद्यालय स्थापना कैना प्रधानमन्त्री प्रचण्डके प्रतिवद्धता
कैलालीके गेटामे सञ्चालनके क्रमे रहल सहिद दशरथ चन्द मेडिकल कलेजहे राष्ट्रिय विज्ञान विश्वविद्यालयके रूपमे सञ्चालन कैना हुइल बा ।
गेटामे सहिद दशरथ चन्द राष्ट्रिय विज्ञान विश्वविद्यालय स्थापना कैना प्रतिबद्धता प्रधानमन्त्रीसे करल नेकपा (एकीकृत समाजवादी) के सांसद प्रेमबहादुर आले जानकारी डेलै ।
एकीकृत समाजवादीके अध्यक्ष एवं पूर्वप्रधानमन्त्री माधवकुमार नेपालके नेतृत्वमे सांसद आलेसहितके टोलीसे प्रधानमन्त्री पुष्पकमल दाहाल प्रचण्ड ओ अर्थमन्त्री प्रकाशशरण महतसंग सोम्मारके रोज भेटघाट करके कैलालीके गेटामे सहिद दशरथ चन्द स्वास्थ्य विज्ञान विश्वविद्यालय सञ्चालन कैना माग करल रहे ।
यी सम्बन्धमे प्रधानमन्त्री दाहाल ओ अर्थमन्त्री डा. महतसंगके छलफल हुइल ओ सरकारसे उ विश्वविद्यालाय स्थापना कैना प्रतिबद्धता व्यक्त करल सांसद आले जानकारी डेलै ।
विश्वविद्यालय सञ्चालन कैना विषयमे प्रधानमन्त्री, अर्थमन्त्रीसंग हमार छलफल हुइल बा, ऐन नानेबेर विश्वविद्यालय बनैना करके नन्ना तयारीसहितके सहमति हुइल बा ।
