प्रदेशके नीति तथा कार्यक्रम पारित
पहुरा समाचारदाता
धनगढी, ३० जेठ । सुदूरपश्चिम प्रदेश सरकारके अइना आर्थिक वर्षके नीति तथा कार्यक्रम बहुमतसे पारित हुइल बा । सभामुख भीमबहादुर भण्डारीसे अइना आर्थिक वर्षके नीति तथा कार्यक्रम बहुमतसे पारित हुइल घोषणा करल हुइट ।
‘हुइ कहुइया माननीय सदस्यसेफे नइहुई कना माननिय सदस्यके संख्या न्यून डेखल ओरसे प्रदेश सरकारके नीति तथा कार्यक्रम बहुमतसे पारित हुइल घोषणा करटु’ सभामुख भण्डारी कहलै ।
यी आघे सभामे भाग लेटी प्रदेशके मुख्यमन्त्री कमलबहादुर शाहसे मानसखण्ड ओ खप्तड सम्मेलनसे सुदूरपश्चिमके पर्यटकीय तथा धार्मिक क्षेत्रके पहिचान कैना सहज हुइल बटैलै ।
सिकलसेलके निःशुल्क परीक्षण तथा उपचार हुई परठ कहिके सामाजिक विकास मन्त्रालयहे निर्देशन डेहल उहाँ बटैलै । उहाँ कुछ स्थानमे उपकरण बिग्रेबेर परीक्षणमे समस्या हुइल बटैलै ।
ओस्टेक उहाँ उर्जा क्षेत्रहे विशेष महत्व डेके काठमाडौंमे रहल विज्ञहुकनसंग छलफल चलाइलफे बटैलै । उहाँ उर्जा क्षेत्रहे आघे बढाई चाहल बटैलै । उहाँ कहलै, ‘नीजि क्षेत्र, संघीय तथा स्थानीय तहसंग समन्वय करके उर्जा क्षेत्रहे विशेष प्राथमिकता धारके आघे बह्रबी ।’
प्रतिपक्ष दल बल्गर हुई परठ कना सत्तापक्षके मान्यता रहल मुख्यमन्त्री शाह बटैलै । उहाँ कहलै, ‘टिकाटिप्पणी हुई परठ । सुझाव आई परठ । हम्रे प्रतिपक्षीके भूमिका खोज्ठी । टिप्पणी नाकारात्मक केल नइहो । सरकारके सकारात्मक बाटफे प्रतिपक्षसे उजागर करे परठ ।’
