प्रस्तावित पधना भलमन्सा ऐनके अन्तिम खाकामे छलफल
पहुरा समाचारदाता
धनगढी, ३० जेठ । कैलालीके धनगढी उपमहानगरपालिकामे प्रस्तावित पधना भलमन्सा ऐनके अन्तिम खाकामे मंगरके रोज वृहत छलफल कैगिल बा ।
नेपाल रानाथारु समाजके आयोजनामे हुइल प्रस्तावित पधना भलमन्सा ऐनके अन्तिम खाकामे हुइल छलफलमे धनगढी उपमहानगरपालिकाके नगर उपप्रमुख कन्दकला रानाथारु प्रस्तावित पधना भलमन्सा ऐन नगरपरिषदमे लैजाके पास कराइक लाग दवाब डेना बटैली ।
संविधानसभा सदस्य तथा निवर्तमान प्रदेशसभा सदस्य मालामति राना पधना,भल्मन्सा प्रथा पहिले परम्परासे चल्टी आइल मने ऐन नइबनलपाछे रानाथारु समुदायके पधना,भल्मन्सा हकअधिकारसे बञ्चित हुई परल बटैली । नेपाल रानाथारु समाजके केन्द्रीय उपाध्यक्ष कमलसिंह राना पधना,भलमन्सा ऐन धनगढी उपमहानगरपालिकामे पास हुइलेसे सुदूरपश्चिम प्रदेशके कञ्चनपुर जिल्लाके और पालिकामेफे लागु करुवाइ सेक्ना बटैली ।
उहाँ प्रस्तावित पधना भलमन्सा ऐनबारे समुदायमे टमान चो छलफल हुइल बटैलै । प्रस्तावित पधना भलमन्सा ऐनके अन्तिम खाकामे हुइल बृहत छलफल कार्यक्रममे धनगढी उपमहानगरपालिकाके टमान वडाके रानाथारु पधना, भल्मन्साहुँक्रनके सहभागिता रहे ।
