धनगढीमे ‘एसी’सहितके प्रतीक्षालय संचालन

पहुरा समाचारदाता
धनगढी, ३० जेठ । कैलालीके धनगढीमे एसीसहितके वातानुकूलित सेवाग्राही प्रतीक्षालय सञ्चालनमे आइल बा ।

धनगढी उपमहानगरपालिकासे अपन कार्यालय परिसरभिटर नानल उ प्रतिक्षालयके उदघाटन सुदूरपश्चिम प्रदेश सरकारक मुख्यमन्त्री कमलबहादुर शाह आज एक कार्यक्रमक विच उदघाटन करले रहिट ।

कार्यक्रममे बोल्टी उहाँ सेवा लेहे आइल सेवाग्राही लम्मा समय लाइनमे बैठे पर्ना, घाममे अशरा लागे पर्ना कार्यसे मुक्ति पैना विश्वास व्यक्त करलै । जनताके पहिल सरोकार रख्न निकाय स्थानीय तह हुइल ओरसे स्थानीय तहसे सेवा प्रवाहहे प्रभावकारी बनैनासंगे गुनासो सहज रूपमे सम्बोधन कैना करके काम करे पर्ना धारणा उहाँ रख्लै ।

धनगढीके नगरप्रमुख गोपाल हमाल उपमहानगरपालिकामे अइना सेवाग्राहीसे आत्मसम्मान महसुस करे पाइट कहिके सुविध सम्पन्न ओ प्रविधिमैत्री प्रतीक्षालय सञ्चालनमे ल्यानल बटैलै । ‘नागरिक सर्वोत्तम हुइट कना मनसायसे सेवा डेहे खोजल हुई । सेवाग्राहीसे काल्ह रूखुवा टरे बैठे परे,’ मेयर हमाल कहलै, ‘सेवाग्राहीहे सहजता ओ आत्मसम्मान महसुस होए कहिके प्रतिक्षालय बनाइल हुई ।’

अपने निर्वाचित हुके आइलपाछे सुरुमे यी निर्णय करलेसेफे भवन बन्न कुछ समय लागल उहाँ बटैलै । प्रतीक्षालयमे सेवाग्राही जम्मा हुसेकलपाछे मेयर, उपमेयर, प्रमुख प्रशासकीय अधिृकत उहे कक्षमे जाके सेवाग्राहीके गुनासो सुन्न अभ्यास सुरुफे कैना उहाँ बटैलै ।

उपमहानगरके उपप्रमुख कन्दकलाकुमारी रानाथारु २२ लाख ५१ हजार रुपैयाँके लागतमे प्रतीक्षालय भवन स्थापना करल बटोइली । यहाँ एसी, डिजिटल बडापत्र, खानेपानी, टिभीलगायत प्रविधि ओ सुविधामे थप ६ लाख २८ हजार रुपैयाँ खर्च हुइल बटैली ।

अपांगतामैत्री प्रतीक्षालयमे एसी, पिना पानी, टेलिभिजन तथा निःशुल्क इन्टरनेटलगायत सुविधा उपलब्ध बा । सेवाग्राहीके सहजताके लाग डिजिटल नागरिक बडापत्रसमेत धारल बा । जेम्ने उपमहानगरसे कौन सेवा लेना का–का कागजात आवश्यक परठ, उ सेवाके लाग कार्यालयके कौन कौन कोठामे जैना, ओकर लाग कटरा शुल्क ओ समय लागठ, जिम्मेवार अधिकारी, सेवाबारे गुनासो सुन्न अधिकारीलगायतके विषयमे जानकारी धारल बा ।

डिजिटल बोर्डमे उपमहानगरपालिकाके कार्यालय ओ नगरभिटरके वडा कार्यालयसे डेना सक्कु मेरिक सेवाके शीर्षक धारल बा । डिजिटल बोर्डके ‘स्क्रिन’मे धारल सेवाके शीर्षकमध्ये सेवाग्राहीसे अपने लेहे चाहल सेवासम्बन्धी शीर्षकमे ‘टच’ करके सेवा लेहेबेर लग्ना शुल्क, समय, आवश्यक कागजात, सम्बन्धित अधिकारी, जाई पर्ना कोठा, प्रक्रिया आदिबारे जानकारी लेहे सेक्ना व्यवस्था करल उपमहानगर जनैले बा ।