मुक्तकमैया ओ सीमान्तकृत समुदायके सवालमे समन्वयात्मक भूमिका रहीः गापा अध्यक्ष

पहुरा समाचारदाता
हसुलिया, ३१ जेठ । कैलाली गाउँपालिकाके अध्यक्ष राजसमझ चौधरी मुक्तकमैया ओ सीमान्तकृत समुदायके सवालमे गाउँपालिका सदा समन्वयात्मक भूमिका निर्वाह कैना जनैले बटै ।

एफसिए नेपाल, लुथरन विश्व फेडरेशन नेपालके आर्थिक सहयोगमे मुक्तकमैया महिला विकास मञ्चके आयोजनामे मंगरके रोज हसुलियामे परियोजना जानकारी तथा समन्वय बैठकमे कार्यक्रमके वडका पहुनासमेट रहल उहाँ बाट बटवाइल रहिट । उहाँ कहलै, कैलारीके करिब सक्कु वडामे मुक्तकमैया बस्ती बा । कमैया, कमलरी मुक्ती घोषणा हुइल मने न्यायिक पुनस्र्थापनाके काम टुंगो लागे नइसेकल हो ।

कैलारीमे टमान वडामे बसोबास कैना मुक्तकमैया अभिनफे अपने बसोबास कैना जग्गाके लालपूर्जा नइपाइल उहाँ बटैलै । एफसिए नेपाल, लुथरन विश्व फेडरेशन नेपालके आर्थिक सहयोगमे मुक्तकमैया महिला विकास मञ्चसे कैलारी टमान योजना तथा कार्यक्रम संचालन कैडेहलमे अध्यक्ष धन्यवाद डेलै । ओस्टेक आब लागु हुइना समुदाय सशक्तीकरणा तथा विकासका लागि स्थानीय पहल परियोजनाहे पालिकासे समन्वय कैके आघे बह्रना बटैलै ।

कार्यक्रमके विशिष्ट पहुना तथा गाउँपालिका उपाध्यक्ष भगवतीकुमारी चौधरी मुक्तकमैया संगे सिमान्तकृत समुदायसे गरिबीके मार परल बटैली । उहाँ कहली, परियोजना लागु हुइलपाछे यहाँके सीमान्तकृत समुदायके तालिम तथा सीपमुलक तालिका पाके आर्थिक स्रोत बह्रैना व्यवसाय कैना सहजुल हुइल बटैली ।

कार्यक्रममे मुक्तकमैया महिला विकास मञ्चके निवर्तमान अध्यक्ष कौशिला चौधरी आर्थिक बर्ष २०७९र ०८० सालमे कैलालीके शिवरत्नपुर, मोहनपुर, सपना शिविर, सुन्दरपुर मुक्तकमैया बस्ती, बन्दरगौरही, के गाउँ मनेहरा टोल, खैरीटोल, हिरापुर, ओम नगर मुक्तकमैया बस्ती ओ कुमाल टोल उत्तरभडरीके २४ समुहके ४९३ घरधुरी संख्यामे काम करल बटैली ।

मुक्तकमैया महिला विकास मञ्चके कार्यक्रम संयोजक इन्द्र चौधरी मञ्चसे कैलारी गाउँपालिकामे आर्थिक बर्ष २०७९।०८० मे परियोजना अन्र्तगत कैगिल गतिविधिबारे जानकारी डेहल रहिट । उहाँ गाउँपालिका स्तरीय समुह अन्तरक्रिया कार्यक्रम, मुक्त कमैया युवाहुकनहे (पिओपी) तालिम, चिया नास्ता तथा डेरीजन्य बस्तु अत्पादन तालिम, मुक्त कमैया युवाहुकनहे कार ड्राइभिङ तालिम, व्यवसाय स्थापनाके लाग सहयोग, कुटानी, पिसानी मिल सहयोग, वित्तीय साक्षरता अभियान, ६ महिने रिफलेक्ट कक्षा संचालन, लैंगिक समानता ओ महिला हिंसा सम्बन्धी छलफल कार्यक्रम, परिवारिक सम्वाद कार्यक्रम, ३१ मुक्त कमैया वालिकाहुकनहे छात्रवृत्ती सहयोग ओ मुक्त कमैया वालवालिकाहुकनके लाग कोचिङ कक्षा संचालन करल जनैलै ।

मुक्तकमैया महिला विकास मञ्चसे कैलाली ओ कञ्चनपुर जिल्लाक बढुवा मजदुरहुकनके सामाजिक, आर्थिक अधिकार प्रवद्र्धनके लाग साझेदारी कार्यक्रम ओ समुदाय सशक्तीकरण तथा विकासका लागि स्थानीय पहल परियोजना संचालन करटी आइल कार्यक्रम संयोजक बटैलै । उहाँ कैलारीमे अइना दिनमे रुपान्तरण शिक्षा प्रशिक्षण सात दिने तालिम, स्थानीय सरकारसंग छलफल, बस्ती छनौट ओ समुह गठनके लाग सहजकर्ता परिचालन, आधारभुत सर्वे ओ सम्भावित उद्यम, व्यवसायके बारेमे अध्ययन कैना जनैलै ।

मुक्तकमैया महिला विकास मञ्चके अध्यक्षता सीमा चौधरीके अध्यक्षतामे हुइल कार्यक्रममे गाउँपालिकाके सक्कु वडाके अध्यक्ष, सामाजिक विकास शाखाके प्रमुख यगम कलेल, टमान शाखाके प्रमुख, मञ्चके सहजकर्ता प्रमिला चौधरीलगायतके सहभागिता रहल रहे ।