गुरुवा बैडवा ओ भल्मन्साहुकनहे कानूनी सचेतना तालिम
पहुरा समाचारदाता
हसुलिया, १ असार । कैलालीके कैलारी गाउँपालिका वडा नम्बर ७ मे गुरुवा बैडवा ओ भल्मन्साहुकनके तीन दिने कानूनी सचेतना तालिम डेजैटी रहल बा ।
कैलाली गाउँपालिका महिला तथा बालबालिका शाखाके आयोजनामे गुरुवा बैडवा ओ भल्मन्साहुकनहे तीन दिने कानूनी सचेतना तालिम डेजैटी रहल हो । उदघाटन कार्यक्रममे वडा अध्यक्ष दिपेन्द्र बहादुर बम भल्मन्सा प्रथा संगे गुरुवा बैडवा थारु समुदायके परम्परासे चल्टी आइल ओरसे यिहीहे संरक्षण करे पर्ना बटैले बटै । उहाँ कहलै, समाजिक क्षेत्र वा विकासके क्षेत्रमे भल्मन्साहुकनके भारी योगदान रहल बा । गुरुवा बैडवाहुकनहे समाज विश्वास करले बा । यिहीहे संरक्षणके कैके धारे परठ । साथे कानूनी मान्यता आवश्यक बा ।
कैलाली गाउँपालिका महिला तथा बालबालिका शाखा प्रमुख बालकुुमारी चौधरी भल्मन्साहुक्रे समाजमे मजा योगदान डेके काम करटी रहल बटैली । उहाँ कहली, भल्मन्साहुक्रे, गुरुवा बैडवा सामाजिक क्षेत्रमे काम करटी रहल मने कानूनी ज्ञान नइबुझके कौनो मुद्दा मिलाईबेर अपनही दुःख पाइल बटैली ।
टमान परम्परागत रितिरिवाज, जातीय विभेद विरुद्ध कानून आइल बा । ओकरबारे जानकारी डेहक लाग तालिमके आयोजना करल उहाँ बटैली । वडा नम्बर ७ अन्र्तगत ३५ जानेक गुरुवा बैडवा ओ भल्मन्साहुकनके सहभागिता रहल तालिममे सहजीकरण अधिवक्ता पुष्पविक्रम शाही करटी रहल बटै । उदघाटन कार्यक्रममे वडा कार्यालयके कर्मचारी, वडा सदस्यहुकनकेफे सहभागिता रहल रहे ।
