नमस्ते सहकारीसे पाँच दिने खाजा बनैना तालिम
पहुरा समाचारदाता
धनगढी, २ असार । नमस्ते बचत तथा ऋण सहकारी सस्था लिमिटेडसे समूह सदस्यहुकनके व्यवसायी, उद्यमी बनाइक पाँच दिने खाजा बनैना तालिम डेले बा । तालिम गैल सोम्मारसे सुरु हुके शुकके रोज निम्जल बा ।
संस्थाके अध्यक्ष जगतराम चौधरीके वडका पहुनामे हुइल कार्यक्रममे सीप सिख्ना मौका बारबार नइअइना बटैलै । उहाँ कहलै, सहकारीसे समूह सदस्यहुकनके व्यवसायी, उद्यमी बनैना लक्ष्य लेले बा । महिला डिडीबाबु सीप सिखके व्यावसाय कैलेसे आर्थिक स्रोत बह्राई सेक्जाई ।
नास्ता पसल मनै आवात जावत हुइना जौनफे ठाउँमे चल्ना ओरसे सिखल सीपके सदपयोग कैनाफे उहाँ आग्रह करलै ।
संस्थाके उपाध्यक्ष रोहितकुमार चौधरी छोट लगानीफे खाजा नास्ता व्यवसाय करे सेक्ना बटैलै । यहाँ खाजा नास्ताके मजा सम्भावना रहल बा । व्यवसायिक रुपमे आघे बह्रलेसे आयस्रोतमे वृद्धि करे सेक्जाई । सहकारीमार्फत यिहीसे पहिले तालिम लेहुइया व्यवसायिक रुपमे आघे बह्रे नइसेकल ओरसे यी तालिम लेके व्यावसायिक रुपमे आघे बह्रलेसे केल तालिमके उपलब्धी हुइना उहाँ बटैलै ।
सहकारीके शिक्षा उपसमिति सदस्य इन्दिरा चौधरी नास्ता पसल संचालन करेबेर सरसफाई ध्यान डेहे पर्ना बटैली । उहाँ कहली, ग्राहक सफा स्वच्छ ओ ताजा खोज्ठै अपनेहुक्रे ओम्ने ध्यान डेबी कलेसे अपनेनके व्यावसाय ओस्टेफे फडको मारी ।
कार्यक्रमके अध्यक्ष तथा सहकारीके शिक्षा उपसमिति संयोजक बुधराम चौधरी जटरा सीप सिख्ली ओकर सदुपयोग कैना बटैलै । उहाँ कहलै, पाँच दिनमे ढेर बाट सिखागैल बा । तालिममे लेहल ज्ञानके प्रयोग करलेसे कौना ना कौनो चिजके ब्राण्ड बनाइ सेक्ना बटैलै ।
तालिम समापन कार्यक्रममे प्रशिक्षक रामसेवक चौधरी व्यापार व्यवसाय संचालन करलपाछे ग्राहकसे शिष्ट भाषा प्रयोग करेपर्ना सुझाव डेलै । कार्यक्रममे तालिममे सहभागी मन्से सावित्री चौधरी, सवढा रानाफे मन्तव्य व्यक्त करल रहिट । तालिम समापन कार्यक्रममे प्रमाणपत्र वितरण संस्थाके अध्यक्ष तथा कार्यक्रमे वडका पहुना जगतराम चौधरी, प्रबन्धक विजय चौधरी, शिक्षा उपसमिति संयोजक बुधराम चौधरी, संस्थाके उपाध्यक्ष रोहितकुमार चौधरीसे कैगिल रहे ।
संचालन समितिके सदस्य ठाकुर प्रसाद करियाप्रधान करले रहिट । पाँच दिने खाजा बनैना तालिममे ३० जानेक सहभागिता रहल रहे ।
