बेहडाबाबा मन्दिरके आयव्यय सार्वजनिक
पहुरा समाचारदाता
धनगढी, २ असार । बेहडाबाबा मन्दिरके यी वर्षके गंगादशहरा मेलाके आयव्यय सार्वजनिक कैगिल बा ।
शनिच्चरके रोज पत्रकार सम्मेलन करटी मन्दिर व्यवस्थापन समितिसे मेलाके आयव्यय सार्वजनिक करल हो । मन्दिर व्यवस्थापन समितिके अध्यक्ष पदमराज जोशी यी वर्ष गंगादशहरा मेलासे मन्दिरके ३१ लाख ७४ हजार ८६१ रुप्या आम्दानी हुइल विवरण सार्वजनिक करले बटै । ओस्टेक, मेला आयोजना करेबेर ७ लाख ८५ हजार ३८९ रुप्या खर्च हुके वचत २३ लाख ८९ हजार ४७२ हुइल बा ।
बचत रकम मन्दिरके खातामे जम्मा करल अध्यक्ष जोशी बटैलै । आम्दानीओर दान पेटीमे ५ लाख ३४ हजार ५, ठेलीमे सहयोग ९९ हजार ५३६, दर्ता शुल्क ५ लाख ९२ हजार ९१५, पार्किङ शुल्कसे २ लाख २० हजार, स्टल तथा पसलसे ७ लाख ६१ हजार ३८५, रमाइलो मेलासे ९ लाख १ हजार ओ धान गोहुँ बिक्रीसे ६६ हजार २० रुप्या आम्दानी हुइल बा । खर्च ओर टमान २६ शिर्षकमे ७ लाख ८५ हजार ३८९ हुइल विवरण सार्वजनिक करल बा ।
मन्दिरमे यी वर्ष २ किलोग्राम ८८३ ग्राम चाँदीके नाग, २ किलोग्राम ३१९ ग्राम चाँदीके जलहरी, ४ दशमलव ५३ ग्राम सोन, तिलहरी पोतेसहित ४० ग्राम, चाँदी ७५ ग्राम ओ एक ठो चाँदीके सिक्का भक्तजनहुक्रे चढाइल पत्रकार सम्मेलनमे बटाइल बा ।
