जाँच अभियान पुर्णता नइपाइटसम सहयोग रहीः मुख्यमन्त्री शाह

पहुरा समाचारदाता
हसुलिया, ३ असार । कैलाली जिल्ला कैलारी गाउँपालिकामे अँटवारसे सिकलसेल एनिमिया ओ थालसेमिया रोग निदानके लाग निशुल्क स्क्रिनिङ सुरु कैगिल बा ।

सुदूरपश्चिम प्रदेश सरकारके आर्थिक सहयोग तथा स्वास्थ्य कार्यालयके आयोजनामे सिकलसेल एनिमिया ओ थालसेमिया रोग निदानके लाग कैलारी गाउँपालिकासंगके समन्वय निशुल्क स्क्रिनिङ अभियान सुरुवाट हुइल हो । यिहे असार ११ गतेसम संचालन हुइना निशुल्क स्क्रिनिङ अभियानके उदघाटन सुदूरपश्चिम प्रदेश सरकारके मुख्यमन्क्री कमलबहादुर शाह एक कार्यत्रमके विच करल रहिट ।

उदघाटन कार्यक्रममे बोल्टी उहाँ सिकलसेल एनिमिया ओ थालसेमिया रोग निदानके लाग प्रदेश सरकार निःशुल्क परिक्षणके व्यवस्था कैना बटैलै । उहाँ कहलै, प्रत्येक नागरिक यकर निशुल्क परिक्षण करेपैना, निशुल्क रुपमे यकर औषधी उपचार करेपैना, व्यवस्थाफे कैना विश्वास डेहुवाई चाहठु जाई । प्रदेश सरकार व्यक्तिके परिक्षण कैना तयारफे उहाँ बटैलै । सिकलसेल जाँच अभियान पुर्णता नइपाइटसम सरकारके सहयोग जारी रहना मुख्यमन्त्री शाह बटैलै ।

सिकलसेल विमारीहे अब्बे संघसे एक लाख रुप्या बराबरके उपचार खर्च डेटी रहल बा । प्रदेश सरकारसे स्थानीय सरकार अपन तरफसे सहयोग करटी बा । नइपुग्लेसे थप परिमार्जन करके लैजैना उहाँ बटैलै ।

जटिल रोग निदानके लाग गरिबी, निमुखा, विपन्न वर्ग, पिछरल वर्गहे प्रदेश सरकार सहयोग कैना तयार रहल बटैलै । यी पालिकामे डगरघाट, स्वास्थ्य, पुल पुलेशा, शैक्षिक विकासके लाग समन्वय कैके आघे बह्रना मुख्यमन्क्री बटैलै ।

कार्यत्रममे सामाजिक विकास मन्त्री झपटबहादुर साउद सिकलसेल एनिमिया ओ थालसेमिया रोग थारु समुदायमे ढेर डेखल मने अब्बे गैरथारु समुदायमेफे डेखल बटैल । उहाँ कहलै, थारु ओ गैरथारु समुदाय विच विहावारी चल्टी रहल ओरसे यी रोग गैर थारु समुदायमे डेखल बटोइल ।

नेपाली काँग्रेस सुदूरपश्चिम प्रदेश संसदीय दलके सचेतक गीता चौधरी थारु समुदायमे यी रोग ढेर डेखल कारण अब्बे थारु समुदाय ज्यादा सचेत हुइना बटैली । उहाँ कहली अब्बे सरकार निशुल्क रुपमे चेकजाँच करटा यम्ने सक्कु जाने चेक कराई पर्ना उहाँ आग्रह करली । लौवा जलमना बच्चामे यी रोग डेखा परल बा । छोट बच्चामे डाईबाबन मन्से आइल ओरसे यी वंशसे जोरल रोग रहल उहाँ बटैली ।

गाउँपालिका अध्यक्ष राजसमझ चौधरीके कैलारीमे सिकलसेल जाँचहे तिब्रता देहल बटैलै । उहाँ कहलै, यी पालिकामे ९५ प्रतिशत थारु समुदाय बटै । पालिकासे यी रोग विमारीहुकनहे उपचारके लाग विशेष सेवा प्रदान करल बटैलै । गाउँपालिका उपाध्यक्ष भगवतीकुमारी चौधरी प्रदेशके योजना स्थानीय तहसे समन्वय नइकरल बटैली ।

कैलारी–१ मनाउ आधारभूत स्वास्थ्य चौकी, वडा–७ प्राथमिक स्वास्थ्य चौकी, वडा –९ गदरियाके स्वास्थ्य चौकीके भौतिक संरचना जिर्ण हुइल ओरसे प्रदेश सरकारसे आवश्यक बजेट विनियोजन कैना जरुरी रहल बटैली । भवनके व्यवस्था नइहुके सेवाग्राही अप्ध्यारो रहल बटैली । कार्यक्रमके संचालन कैलारी गाउँपालिका स्वास्थ्य शाखा प्रमुख नरेश कुमार चौधरी करल रहिट । निशुल्क स्क्रिनिङ अभियान गाउँपालिका अर्न्तगत सक्कु वडामे संचालन हुइना उहाँ बटैलै ।