अनुगमन समितिसे योजनाके अनुगमन

पहुरा समाचारदाता
हसुलिया, ३ असार । चालु आर्थिक बर्षमे पालिका भिटर संचालन हुइल योजनाके कैलारी गाउँपालिका स्तरीय अनुगमन समितिसे अँटवारके रोज अनुगमन करले बा ।

अनुगमन समितिके संयोजक भगवतीकुमारी चौधरीके नेतृत्वमे वडामे संचालित योजनाके स्थलगत अनुगमन कैगिल हो । वडा नम्बर ५ प्रधानमन्त्री रोजगार योजनाके अनुगमन करल बा । वडा नम्बर ५ पवेरासे जबदहुवा हुइटी पालिका प्रहरी चौकीसम सडक स्तरोन्नती अनुगमन कैगिल बा । ठेकेदार काम सम्पन्न करले बा । मने मापडण्ड अनुसार काम नइकरले हो । यकर लाग रु १५ लाख बजेट विनियोजन करल रहे ।

वडा नम्बर ५ जदहुवा गाउँके दक्षिण कर्ल्भट निर्माणके काम अन्तिम चरणमे रहल बा । यकर लाग १५ लाख ८० हजार बजेट विनियोजन करल रहे । सुनहरा आधारभूत विद्यालयमे भवन निर्माणके अनुगमन कैगिल बा । राष्टपति शैक्षिक सुधार कार्यक्रम अर्न्तगत यी भवन निर्माण हुइटी रहल बा । यकर लाग २७ लाख ५० हजार बजेट विनियोजन करल रहे ।

तराई मधेश सम्बृद्ध कार्यक्रम अर्न्तगत जबदहुवाके सिमानासे पुरान भुइयाफाँटा विओपीसम सडक ढलान कालोपत्रेके अनुगमन करल बा । ३० लाख तराई मधेश, २० लाख कैलारी गाउँपालिकासे बजेट विनियोजन करल रहे । यम्ने ग्राभेल विछैना काम करले बा । गिटटी नइडरले हो यहाँफे ढेर काम बाँकी रहल बा ।

वडा नम्बर ७ रतनपुरअर्न्तगत कोठार घर ६ लाख बजेटके काम सम्पन्न हुइल बा । अनुगमन कार्यक्रममे समितिके संयोजक भगवतीकुमारी चौधरी, पूर्वाधार विकास समिति संयोजक प्रेमबहादुर चौधरी, समिति सदस्य सुनिला चौधरी, योजना शाखा प्रमुख सन्तोषकुमार चौधरी, प्रधानमन्त्री रोजगार सहायक इन्द्रश्याम चौधरी, हिमाल कुश्मी लगायतके सहभागिता रहे ।