बाढ ओ आगलागी जन्य विपद जोखिम न्यूनिकरण सम्बन्धी कृतिम घटना अभ्यास
पहुरा समाचारदाता
हसुलिया, ५ असार । कैलाली जिल्लाके कैलारी गाउँपालिका वडा नम्बर ३ खोनपुरमे बाढ ओ आगलागी जन्य विपद जोखिम न्यूनिकरण सम्बन्धी कृतिम घटना अभ्यास कैगिल बा ।
कैलारी गाउँपालिका विपद व्यवस्थापन समितिके तथा विपदके क्षेत्रमे काम कैना संघसंस्था नेपाल रेडक्रस सोसाइटी, सिसिएस, हयविटेट फर हयमानिटी नेपाल, आरडिएन, सहास नेपाल, सिसिएस, एमरेड, मर्सिक्रोप्स नेपाल ओ देवीदल गण कैलालीके आयोजनामे बाढ ओ आगलागी जन्य विपद जोखिम न्यूनिकरण सम्बन्धी कृतिम घटना अभ्यास कैगिल हो । गाउँपालिका अध्यक्ष राजसमझ चौधरीके अध्यक्षतामे हुइल कार्यक्रममे उहाँ बाढ डुबान कटानके समय आइल ओरसे सचेत हुइना उहाँ आग्रह करलै । उहाँ कहलै, कैलारी गाउँपालिका बाढ, डुबान ओ आगलागीके उच्च जोखिम बा । विपद न्यूनिकरणके यहाँ टमान समिति गठन हुइल ओइनहे सक्रिय हुके भुमिका निर्वाह कैना अध्यक्ष आग्रह करलै ।
बाढ ओ आगलागी जन्य विपद जोखिम न्यूनिकरण सम्बन्धी कृतिम घटना अभ्यास अन्र्तगत आगलागी हुइलपाछे कैसिक बुटैना, कैसिक बच्ना अभ्यास कैगिल बा । ओस्टेक बाढमे डुबके घाहिल हुइल व्यक्तिहुकनहे कैसिक बचैना अभ्यास कैगिल बा ।
कार्यक्रममे गाउँपालिका उपाध्यक्ष भगवतीकुमारी चौधरी स्वागत मन्तव्य व्यक्त करटी कृतिम अभ्यास एक ठो नमुना केल रहल बटैली । उहाँ कहली, विपद कौनोफे बेला आइसेकठ । यदि ओसिन समस्या अइलेसे अभ्यासमे व्यवहारमे लागु करे परल । कार्यक्रमके संचालन सामाजिक विकास शाखा प्रमुख यगम कलेल करल रहिट
कार्यक्रममे देवीदल गण कैलालीके सेनानी नवराज नाथ, सिमा सुरक्षा प्रहरी वल गुल्म खोनपुरके डिएसपी नरेश कुमार खडका, नेपाल रेडक्रस सोसाइटी कैलालीके सभापति बासुदेव विनाडी, नेपाल रेडक्रस सोसाइटी केन्द्रीय सदस्य उत्तम जोशी, इलाका प्रहरी कार्यालय हसुलियाके प्रमुख राजेन्द्रसिंह कार्की, कैलारी गाउँपालिकाके वडा अध्यक्षहुक्रे, प्रमुख प्रशासकीय अधिकृत विरबहादुर ऐर, टमान शाखाके प्रमुख, कार्यपालिका सदस्य, वडा सदस्य, स्थानीय, सुरक्षा निकायके प्रतिनिधिहुकनके सहभागिता रहल रहे ।
