खाद्य अधिकारके सवालमे छलफल

पहुरा समाचारदाता
धनगढी, ५ असार । खाद्य अधिकार हनन् हुइल सवालके सम्बन्धमे मंगरके धनगढीमे प्रदेश स्तरीय छलफल कार्यक्रम हुइल बा ।

फियान नेपालके आयोजनामे हुइल कार्यक्रमके सहभागीहुक्रे आपनहुक्रनके खाद्य अधिकार लगायत सुरक्षित बासस्थानके लाग सरोकारवालाके ध्यानाकार्षण करागिल बा ।

बझाङके शेर बहादुर नेपाली अपनेहुक्रे बाढ ओ पहिरोके जोखिममे रहल बटैटी सुरक्षित बासस्थानके लाग सरोकारवालाहे ध्यानाकार्षण कराइल रहिट । उहाँ बाढ ओ पहिरोसे सिँचाईहे फेन प्रभावित पारल ओरसे खाद्यान्न उत्पादनमे फेन समस्या रहल औँल्याइल रहिट ।

भीमदत्त नगरपालिका कञ्चनपुरके लाल बहादुर रावल कञ्चनपुरमे पानीके मुहान रलेसे फेन सिँचाईके समस्या रहल बटाइल रहिट । उहीसे उहाँ प्रत्यक्ष खेतीके लाग किसानहुक्रनहे समस्या परल बटाइल रहिट । उहाँ नगरपालिकाके वडा नम्बर ११, १२ ओ १३ के स्थानीय महाकाली किनारमे बैठल मने खेतीपाटीके लाग सिँचाईके समस्या बटैटी समस्या सम्बोधनके सरोकारवाला निकायहे आग्रह करल रहिट ।

ओस्टके कैलारी गाउँपालिका वडा नम्बर ३ शिवरत्नपुरके कमलप्रसाद चौधरी मोहना लडियासे आपनहुक्रनके उठीबास हुइल बटाइल रहिट । उहाँ मोहना लडियामे पुल नैहोके बर्खाके बेला दुःख बेमार परल बेला ढेर समस्या हुइना बटैलै । ओस्टके विद्यार्थीहुक्रनहे फेन बर्खाके बेला लडिया नाघके पह्रे जाइ पनौ समस्या रहल बटैटी मोहना लडियासे हुइना कटान डुबानहे नियन्त्रके लाग तत्बन्ध ओ पुलके माग राखल रहिट ।

कार्यक्रमके बर्का पहुना सुदूरपश्चिम प्रदेश सभा सदस्य प्रकाश बम कार्यक्रममे सहभागीहुक्रने उठाइल समस्या सम्बोधनके लाग आपन ओरसे सेक्ना सहयोग कैना प्रतिवद्धता जनाइल रहिट ।

उहाँ आभिन फेन प्रदेश विकास निर्माणसे लेके सक्कु क्षेत्रमे पाछे परल बटैटी उहाँ जनताहुक्रनके हक अधिकारके लाग आपन सदैव साथ सहयोग रहना बटाइल रहिट ।

फियान नेपालके महासचिव रामबहादुर पुनके अध्यक्षतामे हुइल कार्यक्रममे फियान नेपालके कार्यकारी निर्देशक अशोक बहादुर सिंह स्वागत मनतब्य राखल रहिट । कार्यक्रममे विभिन्न संस्थाके प्रतिनीधी, सरोकारवाला निकायके प्रतिनीधीहुक्रनके सहभागिता रहल रहे ।