मन्त्री सिंहके पार्थिव शरीरमे राष्ट्रिय झण्डा ओह्राके श्रद्धाञ्जली
पहुरा समाचारदाता
धनगढी, ६ असार । सुदूरपश्चिम प्रदेशके मुख्यमन्त्री कमलबहादुर शाह अन्तिम श्रद्धाञ्जलीके लाग धनगढीके कभर्ड हलमे राखल सुदूरपश्चिम प्रदेश सरकारके आन्तरिक मामिला तथा कानुनमन्त्री पृथ्वीबहादुर सिंहके पार्थिव शरीरमे राष्ट्रिय झण्डा ओह्राके श्रद्धाञ्जली डेले बाटै ।
मुख्यमन्त्री शाहसंगे प्रदेशके मन्त्री, धनगढी उपमहानगरपालिकाके मेयर गोपाल हमाल लगायत सयौंके संख्यामे उपस्थित स्थानीय तथा आफन्तहुक्रे श्रद्धाञ्जली अर्पण करल रहिट । श्रद्धाञ्जली अर्पण कैटी मुख्यमन्त्री शाह मन्त्री सिंहके मृत्युसे प्रदेश एक कुशल ब्यक्ति ओ सरकार एक असल मन्त्री गुमाइ परल कहटी दुःख व्यक्त करलै ।
बुधके सकारे धनगढीस्थित कभर्डहलमे सिंहके पार्थिव शरीरमे अन्तिम श्रद्धाञ्जली डेसेकल पाछे ओहकान पार्थिव शरीरहे अन्तिम संस्कारके लाग हेलिकप्टर मार्फत बझाङ लैगिल सुदूरपश्चिम प्रदेश सरकार जनैले बा ।
मंगरके धनगढीसे डडेल्धुरा जैटी रहल मन्त्री सवार सुपप्र ०१००१ झ ४८० नम्बरके गाडी डडेल्धुरासे चैनपुर जैना क्रममे केदारस्युँ गाउँपालिकाके धारछडा कना ठाउँमे सडकसे अन्दाजी ५० मिटर टरे कालंगा खोलुवा किनारमे गिरके गाडीमे सवार मन्त्री सिंह, गोसिनीया अमृता सिंह, भौजी जयादेवी सिंहके मृत्यु हुइल रहे ।
