बहुपक्षिय सेवा प्रदायकहुकननसंग अन्तरक्रियात्मक अनुशिक्षण
पहुरा समाचारदाता
धनगढी, ६ असार । पीडित केन्द्रीय दृष्टिकोणसे लैंङिक हिंसाके सम्बोधनमे बहुपक्षिय सेवा प्रदायकहुकननसंग अन्तरक्रियात्मक अनुशिक्षण सुरु हुइल बा ।
महिला कानून र विकास मञ्चके आयोजना तथा यूएनएफपिए, आइपासके सहकार्यमे अइना १० गतेसम पीडित केन्द्रीय दृष्टिकोणसे लैंङिक हिंसाके सम्बोधनमे बहुपक्षिय सेवा प्रदायकहुकननसंग अन्तरक्रियात्मक अनुशिक्षण हुइटी रहल बा ।
उदघाटन कार्यक्रम धनगढी उपमहानगरपालिकाके उप प्रमुख कन्दकला राना रहल रहिट । कार्यक्रममे सम्बोेधन करटी उहाँ भौतिक विकास संगे मानविय विकास हुइना जरुरी रहल बटैलै । उहाँ कहली, समाजमे विकृति बा । समाजहे गलत डगर जैनासे बचाइक लाग मानविय विकास आवश्यक बा । यूवा पुस्ता लागु औषध दुव्र्यसनीमे फस्टे । लैंगिक हिसाके घटना बह्रल । बालविवाह, बहुविवाह, घरेलु हिंसा न्यूनिकरणके लाग गहन छलफल जरुरी बा ।
उपप्रमुख राना कहली, गाउँघरमे हुइना लैंगिक हिंसा, विवाद, झैझगडा कानूनी रुपमे मिलैलेसेफे मन मिलैना ओटरा सहजुल नइरहल हो । न्यायिक समिति, मेलमिलाप कर्ता विवाद मिलाईबेर दुई पक्षके मन मिलाके फैसाला कैना उहाँ आग्रह करली ।
कार्यक्रममे विशिष्ट पहुना रहल राष्ट्रिय महिला आयोगके अध्यक्ष कमला पराजुली महिला आयोगसे महिलाहुकनके मुद्दा, लैंङिक हिंसा न्यूनिकरणमे खेल्टी आइल भूमिकाबारे जानकारी डेहल रहिट ।
यूएनएफपिएके प्रदेश प्रमुख कृष्ण प्रसाद भट्टराई लैंगिक हिंसाके अन्त्य हुइ परठ कना उद्देश्यसे अपने काम करटी आइल बटैलै । लैंगिक हिंसा न्यूनिकरणके लाग धार्मिक गुरुवालगाायत व्यवहार परिवर्तन कैना, टमान समुहसे छलफल अन्तरक्रिया कार्यक्रम करल उहाँ बटैलै । लैंगिक हिंसा न्यूनिकरणके लाग स्थानीय सरकार ओ प्रदेश सरकार समन्वय करके आघे बह्रना जरुरी रहल बटैलै ।
महिला कानून र विकास मञ्चके निर्देशक सविन श्रेष्ठ संविधानमे महिला तथा बालबालिकाके लाग अधिकार ओ कानून बनल मने कार्यान्वयन नइहुइल बटैले । उहाँ यूएनएफपिएके सहकार्यमे लैंगिक हिंसा न्यूनिकरणके लाग टमान गतिविधि बह्राइल बटैलै । बहुपक्षिय सेवा प्रदायकहुकनके सहभागितामे हुइटी रहल उदघाटन कार्यक्रमके संचालन अधिवक्ता रेणु प्रधानश्रेष्ठ करल रहिट । पाँच दिनसम संचालन रहना अनुशिक्षणमे सहजीकरण वरिष्ठ अधिवक्ता मिरा ढुंगाना, महिला कानून र विकास मञ्चके निर्देशक सविन श्रेष्ठ, अधिवक्ता सतिश शर्मा, अधिवक्ता नविन श्रेष्ठ ओ अधिवक्ता रेणु प्रधान श्रेष्ठलगायतसे करजैटी रहल बा ।
