विपद न्यूनिकरण कृतिम अभ्यासके समीक्षा
पहुरा समाचारदाता
हसुलिया, ७ असार । कैलाली जिल्लाके कैलारी गाउँपालिका वडा नम्बर ३ खोनपुरमे कैगिल बाढ ओ आगलागी जन्य विपद जोखिम न्यूनिकरण कृतिम अभ्यासके समिक्षा कैगिल बा ।
कैलारी गाउँपालिका विपद व्यवस्थापन समितिके तथा विपदके क्षेत्रमे काम कैना संघसंस्था नेपाल रेडक्रस सोसाइटी, सिसिएस, सहास नेपाल, आरडिएन नेपालगायतसे कैगिल विपद जोखिम न्यूनिकरण कृतिम अभ्यासके विफेक रोज समिक्षा कैगिल हो । गाउँपालिका अध्यक्ष राजसमझ चौधरी विपद जोखिम न्यूनिकरण कृतिम अभ्यास मजा रहल मने सुरक्षा निकायसे समन्वय कम विल्गाइल बटैलै । उहाँ कहलै, अभ्यास मजा हुइल बा, मने कौनो विपद आगिलेसे सामना करेक लाग सक्कु लग्ना आवश्यक बा । जनतनहे जागरुक ओ ज्ञान सीपके लाग अभ्यास कैके डेखैना जरुरी बाा ।
गाउँपालिका उपाध्यक्ष गैल बरस कृतिम अभ्यास मजा हुइल बटैली । उहाँ कहली जनतनहे सिखाइक लाग यी प्रयाप्त हो । मने सक्कु क्षेत्रसे समन्वय करके आघे बह्रे सेक्लेसे आउर मजा हुइना उहाँ बटैली । गाउँपालिकाके प्रमुख प्रशासकीय अधिकृत विरबहादुर ऐर कृतिम अभ्यास जारी रख्लेसे नइजानल मनै ज्ञान आर्जन करे सेक्ना बटैलै ।
समिक्षा कार्यक्रममे सामाजिक विकास शाखा प्रमुख यगम कलेल, कैलारी गाउँपालिका विपद व्यवस्थापन शाखाके फोकल पर्सन भुवन बखरिया, सहास नेपालके कृषि प्राविधिक नर बहादुर जिरेल, नेपाल रेडक्रस सोसाइटीके प्रतिनिधि ताराणीदत्त पाण्डे, सिसिएसके मिना चौधरी, आरडिएनके गोरख सार्कीलगायतके उपस्थिति रहे ।
यिहे असार पाँच गते बाढ ओ आगलागी जन्य विपद जोखिम न्यूनिकरण सम्बन्धी कृतिम घटना अभ्यास अन्र्तगत आगलागी हुइलपाछे कैसिक बुटैना, कैसिक बच्ना अभ्यास कैगिल बा । ओस्टेक बाढमे डुबके घाहिल हुइल व्यक्तिहुकनहे कैसिक बचैना अभ्यास कैगिल बा ।
