‘वनुवा संरक्षणमे महिलाके भूमिका ढेर बा’
पहुरा समाचारदाता
हसुलिया, ७ असार । कैलारी गाउँपालिकाके उपाध्यक्ष भगवतीकुमारी चौधरी बनुवा संरक्षणमे महिलनके भूमिका अहम रहल बटैले बटी ।
कैलारी गाउँपालिकाके आर्थिक सहयोगमे थारु महिला संजाल कैलारीके आयोजनामे विफेक रोज हसुलियामे सुरु हुइल जलवायू परिवर्तन, रेडप्लस वातावरण अनुकुलन ओ दिगो विकासका लागि महिलाहरुको भूमिका सम्बन्धी दुई दिने प्रशिक्षण उदघाटन कार्यक्रमके वडका पहुना रहल उहाँ ओसिन बत्वाइल रहिट ।
महिलाके जिम्मेवारी पुरुषसे ढेर बा, उहाँ कहली, महिलाहुक्रे घर, बाहेर सक्कु ओर भूमिका निभैठै । घर परिवारके जिम्मेवारीसंगे नेतृत्वकर्ताके भूमिकाफे निभैटी बटै । महिला अध्यक्ष रहल सामुदायिक वनमे प्रगतिके संग्गे सरक्षण ओ पारदर्शिफे हुइल बा ।’
जलवायु परिवर्तनके कारण वातावरणमे असर परल । समयमे पानी नइबरसना । बेमौसमी बाढ प्रकोप अइना । घाम महिनामे ढेर घाम खडेरी हुइना ओ जार महिनासे ढेर जार हुइटी रहल उपाध्यक्ष बटैली । खोलानाल मिच्के घर भौतिक संरचना बनाइल कारण डुबानके समस्या डेखलफे उहाँ बटैली ।
कार्यक्रममे वन वातावरण तथा विपत व्यवस्थापन समिति संयोजक तथा वडा नम्बर ४ वडा अध्यक्ष ठागुराम चौधरी जलवायू परिवर्तनके कारण औषतसे कम पानी बरसल बटैलै ।
सिएफसिसि बसन्ताके अध्यक्ष रमेश चौधरी मानव जीवनके लाग रुखुवाके महत्व ढेर रहल बटैलै । उहाँ कहलै, रुखुुवाके कारण हम्रे बाँचल बटी । अक्सिजनके लाग बन संरक्षण कैना आवश्यक बा । कैलारी गाउँपालिकामे नौ वडा रहलमे वडा नम्बर ६, ९ सामुदायिक वन फुलवारी मतहतमे पर्ना, २ ओ ८ वडाफे उदासीपुरमे पर्ना ओरसे यहाँके उपभोक्ता अपन पालिकासे सेवा लेहे नइपैना अवस्था रहल बटै ।
थारु महिला संजाल कैलारीके अध्यक्ष सरिता चौधरीके अध्यक्षतामे हुइल उदघाटन कार्यक्रममे वडा नम्बर ६ के वडा अध्यक्ष प्रेमबहादुर चौधरी, राष्ट्रिय आदिवासी जनजाति महिला मञ्के अध्यक्ष माया चौधरीलगायतके सहभागिता रहल रहे ।
कार्यक्रममे स्वागत मन्तव्य संजालके उपाध्यक्ष आरती चौधरी ओ संचालन सचिव अनिता चौधरी करले रही । दुई दिने प्रशिक्षण कार्यक्रममे नेपाल आदिबासी जनजाति महासंघ सुदूरपश्चिम प्रदेश अध्यक्ष दलबहादुर घर्ती मगर ओ सन्दिप चौधरी प्रशिक्षण डेटी रहल बटै ।
