धनगढी उपमहानगरसे वार्षिक नीति तथा कर्यक्रम पेश
पहुरा समाचारदाता
धनगढी, ७ असार । कैलालीके धनगढी उपमहानगरपालिकासे बिफेक रोज वार्षिक नीति तथा कर्यक्रम पेश करले बा ।
नगरप्रमुख गोपाल हमाल अइना आर्थिक बर्ष २०८०/०८१ के नीति तथा कार्यक्रम सभाममे पेश करल हुइट । नीति तथा कर्यक्रमसे युवा लक्षित व्यवसायिक कृषि कार्यक्रम एवम् एकल महिला, मुस्लिम महिला, अपांगता रहल महिला, दलित महिला, लैंगिक तथा यौनिक अल्पसंख्यक, भूमिहिन, जनजाति ओ मुक्त कमैया परिवारके आम्दानी बढैना टिना खेती, च्याउ खेती तथा मसलाबालीसँग सम्बन्धित कार्यक्रम सञ्चालन कैना उल्लेख बा ।
‘कृषिजन्य उत्पादनके बजारीकरणके लाग कृषि थोकबजार, कृषि हाटबजार, कृषि उपज संकलन केन्द्र निर्माण करके सञ्चालन कैना ओ बजारीकरणके लाग आवश्यक पर्ना सामानमे अनुदानके व्यवस्था कैना बा,’ निति तथा कर्यक्रममे कहल बा ।
ओस्टेक आलुके बीउ उत्पादन ओ भण्डारणमे अनुदानके व्यवस्था कैना जनाइल बा । ‘उन्नत तथा थारु आलु उत्पादनके लाग आलु उत्पादन पकेट क्षेत्र विकास कार्यक्रम लागु कैना बा,’ नीति तथा कर्यक्रममे बा ।
ओस्टेक पर्यटन सेवासे प्राप्त हुइना लाभ स्थानीय समुदाय ओ जनतामे पुगैना ग्रामीण पर्यटकीय क्रियाकलापके विस्तार तथा अभिवृद्धि जनाईल बा । ‘हाल विद्यमान रहल पर्यटकीय स्थलके स्तरोन्नति कैनाके साथे नयाँ पर्यटकीय गन्तव्य स्थलके पहिचान करके सुरक्षित गन्तव्ययुक्त पर्यटन पूर्वाधार विकास करटी पर्यटकहे उपलब्ध करैना सेवाके सहज पहुँच ओ बसाईके अवधि लम्ब्याके स्थानीयस्तरमे रोजगारीके अवसरके वृद्धि करके उपमहानगरबासीके जीवनस्तरमे सुधार कैना बा,’ नीति तथा कर्यक्रममे बा ।
आधारभूत स्वास्थ्य सेवाहे प्रभावकारी तथा गुणस्तरीय बनैना स्वास्थ्य संस्थाहे आवश्यक पर्ना पुर्वाधार, औषधी, उपकरण लगायतके अन्य श्रोतसाधन वृद्धि करटी प्रविधिमैत्री बनैना नीति तथा कर्यक्रममे समावेश करल बा ।
ओस्टेक महिला स्वास्थ्य स्वयंसेविकासे करल कार्यके कदर करटी हाल पैटी रहल सेवा सुविधाहे समयानुकुल पुनरावलोकन करके सेवाहे प्रोत्साहित कैना जनाइल बा । महिला सामुदायिक स्वास्थ्य स्वयम् सेविका कार्यक्रमहे थप शंसक्त ओ प्रभावकारी पर्ना नगर प्रमुख हमालसे जनैले बटै ।
बहुल सांस्कृतिक एवम् सम्पदाके संरक्षण, मौलिक संस्कृतिके जगेर्ना, सांस्कृतिक पर्यटन प्रवर्द्धन ओ सक्कु समुदायके धार्मिक, भाषिक सञ्चार एवम् सांस्कृतिक मूल्य मान्यताके अभिवृद्धि करटी लैजैना कहल बा । थारु तथा रानाथारु समुदायमे प्रचलित गुरुवा, भलमन्सा, बडघर प्रथा, भुईया, देउथान, लगायत संस्कृतिके उचित संरक्षण एवम् प्रवद्र्धन कैना नीति तथा कार्यक्रममे कहल बा ।
“हाम्रो धनगढीः हामी बनाउँछौं” कना गैल वर्षसे सुरु हुइल अभियानहे धनगढीबासीके सहयोग ओ सहकार्यमे यी वर्षफे निरन्तरता डेके व्यवस्थित दिगो सुरक्षित पूर्वाधार विकास कैना नीति लेना नगर प्रमुख हमाल बटैलै ।
