इलेक्ट्रिक बाइक निर्माणकर्ता पारसहे सम्मान
पहुरा समाचारदाता
धनगढी, ८ असार । इलेक्ट्रिक बाइक निर्माण करुइया कैलाली गोदावरी नगरपालिका–५, गेटाके पारस साउँदहे धनगढीस्थित एसपीए कलेज कदरपत्रसहित सम्मान करले बा ।
शुकके रोज क्याम्पस प्रमुख योगराज उपाध्याय इलेक्ट्रिक बाइक निर्माण कैके युवाहुकनके लाग प्रेरणा बनल कटि उहाँहे सम्मानपत्र प्रदान करले रहैं ।
यिहे वर्ष एसईई डेहल पारसके प्रतिभाहे प्रोत्साहन डेना उद्देश्यसे कलेज उहाँहे शतप्रतिशत छात्रवृत्ति डेना समेत घोषणा करले बा । साथे कलेज पारसके आगामी प्रोजेक्टमे फेन लगानी करना प्रतिवद्धता जनैले बा ।
‘नवप्रवर्तक, आविष्कार, उद्यमीहे प्रोत्साहन करना, उहाँहुकनहे आघे बह्रना प्रेरित करना एसपीएके नीति हो,’ क्याम्पस प्रमुख उपाध्याय कलैं, ‘यीआघे फेन एसपीए टमान आविष्कारक विद्यार्थीहुकनहे प्रोत्साहन सहयोग करटि आइल बा । पारसहे फेन हम्रे शतप्रतिशत छात्रवृत्तिमे अध्ययन करैना तथा उहाँक आगामी प्रोजेक्टमे सहयोग करना घोषणा करे पाके अन्त्यन्ते खुशी लागल बा ।’
अपन प्रतिभाहे चिन्हके कलेजसे करल सम्मानप्रति पारस आभार व्यक्त करलैं । साथे अपन भविष्यके प्रोजेक्टमे एसपीएसे सहयोग पइना हुइल ओरसे अन्त्यन्ते खुशी लागल बटैलैं ।
पारस घरमे डेढ महिनाके समयमे लगभग १ लाख रुपैयाँके लागतमे उ मोटरसाइकल निर्माण करले रहैं । उहाँसे बनाइल बाइक आरएफआईडी सिस्टमयुक्त हो । जेकर कारण बाइक स्टार्ट करना चाभीसँगे एक विशेष कार्डके फेन आवश्यकता परठ । जेकर कारण बाइक चोरिना सम्भावना नैरहठ । मोटरसाइकल ६० किलोमिटरके गतिमे चलठ कलेसे एकचो चार्ज करलसे ७० से ८० किलोमिटरसम बाइक डौरठ ।
बाइक निर्माणमे पारसहे एसपीएके विद्यार्थी सोहन कैनी ओ सागर खनाल सहयोग करले रहैं । यीआघे सोहन कलेजके सहयोगमे इलेक्ट्रिक बाइक ओ सागर एसपीए इभी मोडल वान कारके निर्माण करले रहैं ।
