कैलारीमे ९ सय २१ जनहनमे सिकलिङ पोजेटिभ
पहुरा समाचारदाता
हसुलिया, ८ असार । कैलाली जिल्लाके कैलारी गाउँपालिकामे यिहे असार ३ गतेसे सुरु हुइल सिकलसेल एनिमिया ओ थालसेमिया रोग निदानके लाग कैगिल निशुल्क स्क्रिनिङमे ९ सय २१ जनहनमे सिकलिङ पोजेटिभ डेखल बा ।
सुदूरपश्चिम प्रदेश सरकारके आर्थिक सहयोग तथा स्वास्थ्य कार्यालयके आयोजनामे सिकलसेल एनिमिया ओ थालसेमिया रोग निदानके लाग कैलारी गाउँपालिकासंगके समन्वय गैल असार ३ गतेसे ८ गतेसम निशुल्क स्क्रिनिङ अभियान सुरु कैगिल रहे । १ से ९ वडाके ६ हजार ७ सय ६४ जानेक रगत परिक्षण करेबेर ९ सय २१ जनहनमे सिकलिङ पोजेटिभ डेखल कैलारी गाउँपालिका स्वास्थ्य शाखाके प्रमुख नरेशकुमार चौधरी बटैलै ।
उहाँ कहलै पोजेटिभ डेखल केसहे एचवि इलेक्ट्रोफ्रोसिस चेकजाँच करेबेर ट्रेट ओ डिजिज पत्ता लग्ना उहाँ बटैलै । पोजेटिभ केसके नतिजा एक अठुवारभिटर अइना उहाँ जनैलै ।
वडा नम्बर १ मे ९४९ जानेक चेकजाँचमे ७८, वडा नम्बर २ मे ७९८ जानेक जेकजाँच करेबेर ९०, वडा नम्बर ३ मे ६९२ जानेक जाँच करेबेर ८७, वडा नम्बर ४ मे ८७४ जानेक जाँच करेबेर ९७, वडा नम्बर ५ मे ९४१ जानेक जाँच करेबेर २२९, वडा नम्बर ६ मे ५७३ जानेक जाँच करेबेर ६८, वडा नम्बर ७ मे ५५१ जानेक जाँच करेबेर ७९ , वडा नम्बर ८ मे ६७४ जानेक जाँच करेबेर १४१ ओ वडा नम्बर ९ मे ७१२ जानेक जाँच करेबेर ८२ जाने करके जम्मा ९२१ जनहनमे सिकलिङ पोजेटिभ देखल उहाँ बटैलै ।
गाउँपालिकाके सम्पर्क रहिके अब्बे ९५ जाने उपचार करैटी रहल स्वास्थ्य शाखा प्रमुख बटैलै ।
