सूचना लेके केल वैदेशिक रोजगारमे जैना उपप्रमुख रानासे आग्रह
पहुरा समाचारदाता
धनगढी, १० असार । धनगढी उपमहानगरपालिकाके नगर उपप्रमुख कन्दकला राना सूचना लेके केल वैदेशिक रोजगारमे जैना आग्रह करले बटी ।
धनगढी उपमहानगरपालिकासे सुरक्षित आफ्रवासन (सामी) कार्यक्रम अर्न्तगत अँटवारके रोज धनगढीमे आयोजना कैगिल सुरक्षित वैदेशिक रोजगार सम्बन्धी संचारकर्मीहुकनसे कैगिल अन्तरत्रिया कार्यक्रममे उहाँ ओसिन आग्रह करल रहिट । उहाँ कहली, वैदेशिक रोजगारमे बहुट जैसिन यूवा, यूवती डगवा पैले बटै । कतिपय अलपत्र परल परल खबर आइठ । वैदेशिक रोजगारके लाग विदेश जउइयाके यहाँ हेल्प डेस्क स्थापन करल बा । परामर्श लेके, सीप सिखके वैदेशिक रोजगारमे जाई परल ।
विदेश जाई पर्ना अवस्था रहलेसे श्रम स्वीकृृति लेके ओ विमा करके जैना उपप्रमुखसे आग्रह करली । उहाँ कहली विदेशसे लौटके आइल टमान जैसिन नेपाली स्वदेशमे रोजगारी वा व्यवसाय सुरु करले बटै ।
कार्यक्रमे सुदूरपश्चिम प्रदेश, कर्णाली ओ लुम्बिनी प्रदेश संयोजक पञ्चराम चौधरी यहाँ सीमित रोजगारीके अवसर, गरिबी लगायतके कारण वैदेशिक रोजगारप्रति यूवा युवतीके आर्कषण बह्रल बटैलै । उहाँ कहलै, विना सूचना, विना सीप सिखल गैल यूवा डलालके चंगुलमे परल बटैलै कार्यक्रममे वैदेशिक रोजगारके परिवेश,सुरक्षित आप्रवासन (सामी ) कार्यक्रम ओ स्थानीय सरकारके भुमिकाबारे सामी परियोजना कार्यक्रम संयोजक दीपक बोहरा प्रस्तुतीकरण करल रहिट ।
नेपालमे प्रतिबर्ष करिब ५ लाखसे ढेर श्रमशक्ति श्रम बजारमे प्रवेश उहाँ बटैलै । नेपालसे श्रम स्वीकृत लेके वैदेशिक रोजगारमे जउइयाके संख्या ६९ लाख नाघसेकल बटैलै । हाल दैनिक सरदर २ हजार ५ सय जाने वैदेशिक रोजगार जैना करल बटै । वैदेशिक रोजगारके लाग खुल्ला १११ देश खुल्ला करल बा ।
आ.व. ०७८/७९ मे रु.१० खर्ब ०७ अर्ब विप्रेषण भिटरल बा । कुल ग्राहस्थ उत्पादनसंग तुलना करेबेर करिब २०.७५ प्रतिशत हिस्सा हुइना आइठ ।
कैलालीमे धनगढी उप–महानगरपालिका, टीकापुर नगरपालिका, घोडाघोडी नगरपालिका ओ जानकी गाउँफालिकामे सामी कार्यक्रम लागु हुइल बा । कार्यत्रममे धनगढी उपमहानगरपालिकाके सामी कार्यक्रमके फोकल पर्सन टंक विष्ट, लक्ष्मी चौधरी ओ विष्णु चौधरी लगायत संचारकर्मीनहे सहभागिता रहे ।
