चालु आर्थिक बर्षमे संचालित योेजनाके अनुगमन

पहुरा समाचारदाता
हसुलिया, ११ असार । कैलारी गाउँपालिका स्तरीय अनुगमन समितिसे सोम्मारके रोज टमान वडामे संचालित योजनाके अनुगमन करले बा ।

अनुगमन समिति संयोजक भगवतीकुमारी चौधरीके अगुवाईमे चालु आर्थिक बर्षमे संचालित योजनाके स्थगल अनुगमन कैगिल हो । वडा नम्बर ७ फुइयाँफाँटामे चन्द्रिका चौधरी घर लग्गेसे रामपुरसमके सडकरोन्नतीके अनुगमन कैगिल बा । यकर लाग १५ लाख बजेट विनियोजन कैगिल रहे । वडा नम्बर ७ बसन्ता रेञ्जपोष्टसे वडा कार्यालयसम साढे पाँच लाखके सडक ग्राभेल कैगिल रहे ।

वडा नम्बर ७ मे रहल जनता आधारभूत विद्यलय ओ वडा नम्बर १ मे रहल जनता आधारभूत विद्यलयके भवनके अनुगमन कैगिल बा । दुनु भवन विल्ड अन ओ कैलारी गाउँपालिकाके साझेदारीमे निर्माण कैगिल हो ।
वडा नम्बर ५ मनिकापुरमे रहल अधुरा सुरक्षित भवनके अनुगमन हुइल बा । यकर लाग ११ लाख बजेट विनियोजन हुइल रहे । वडा नम्बर ५ जबदहुवाके दक्षिण ओर १५ लाख ८० हजारमे निर्माण हुइल कल्भर्टके अनुगमन कैगिल बा ।

ओस्टेक करके वडा नम्बर ५ रहल मनकामना प्राविके भवन निर्माणके अनुगमन कैगिल बा । यकर लाग ४० लाख बजेट विनियोजन करल रहे । वडा ननम्बर ४ ओ ५ मे प्रधानमन्त्री रोजगार कार्यक्रमके अनुगमन कैगिल बा । वडा नम्बर ७ स्थित फुइयाँटाके राष्टिय माविके भवनके अनुगमन कैगिल बा । यहाँ काम बाँकी रहल ओरसे समयमे काम सेक्ना आग्रह करल बा । अनुगमनमे समितिके संयोजक तथा गाउँपालिका उपाध्यक्ष भगवतीकुमारी चौधरी, पूर्वाधार विकास समिति प्रेमबहादुर चौधरी, योजना शाखाके प्रमुख सन्तोषकुमार चौधरी, समितिके सदस्य सुनिला चौधरी, प्रधानमन्त्री रोजगार सहायक इन्द्रश्याम चौधरी, प्राविधि हिमाल कुश्मीके सहभागिता रहे ।