धनगढीके मुख्य सडक शिलान्यास
पहुरा समाचारदाता
धनगढी, १२ असार । धनगढीके कैलाली पुलसे क्याम्पस चोकसम मुख्य सडक निर्माणके लाग शिलान्यास करल बा । सुदूरपश्चिम प्रदेश सरकारके भौतिक पूर्वाधार विकासमन्त्री प्रकाशबहादुर देउवा मंगरके कैलाली पुलसे क्याम्पस चोक सडकके शिलान्यास करल हुइट ।
प्रदेश सरकारसे कैलाली पुलसे क्याम्पस चोक सडक निर्माणके लाग ५१ करोड ६९ लाखमे २०८२ साल बैशाख २६ गते २४ महिनाभिट्टर काम ओरैना मेरके ठेक्का सम्झौता करल बा । २ किलोमिटर ३ सय मिटर लम्बाईके मुख्य सडक ३० मिटर चौडा बन्ना बा । दुई बरसभिट्टर निर्माण सम्पन्न हुइना मेरके धनगढीके केएस कन्स्ट्रक्सन निर्माणके जिम्मा पाइल बा ।
यकर ठेक्का २०८० बैशाख २७ गते हुइल रहे । यी सडक निर्माण करेक लाग केएस कन्स्ट्रक्सन प्रालि धनगढी–२ कैलाली जिम्मेवारी पैले बा । १४÷१४ मिटरके मुख्य सडकके दायाँबायाँ डेढ÷डेढ मिटरके खानेपानी ओ टेलिफोनके लाग अन्डरग्राउण्ड पास हुइना ईन्जिनियर भट्ट बटैलै ।
उहाँ सडकके बीचमे २ मिटरके डिभाइडर समेत रहना बटैलै । कैलाली पुल–क्याम्पस चोक सडक निर्माणके लाग भौतिक पूर्वाधार विकास मन्त्री देउवा उद्घाटन करल हुइट । मेयर गोपाल हमाल उ सडक खण्डमे पर्ना पक्की भौतिक संरचना भत्कैना घर धनीहे अपील करल रहिट ।
बिना कौनो रोकावट सक्कु घरधनीहुक्रे आपन घर भत्काके सडक निर्माणमे सहज करल स्मरण कैटी मेयर हमाल सक्कु जनहनहे धन्यवाद डेटी निर्माणमे सहज करुइया घर धनीहे सम्मान कैना बटाइल रहिट ।
शिलान्यास तथा सडक उद्घाटन कार्यक्रममे उद्योग, पर्यटन, वन तथा वातावरण मन्त्री रमेशसिंह धामी, धनगढी उपमहानगरपालिकाके नगरप्रमुख गोपाल हमाल लगायतके उपस्थीति रहल रहे ।
ओस्टके उपप्रमुख कन्दकलाकुमारी राना, भौतिक पूर्वाधार मन्त्रालयके सचिव प्रेमदत्त भट्ट, वडाध्यक्ष, जनप्रतिनिधि लगायतके सहभागिता रहल रहे । साथे धनगढी उपमहानगरपालिकासे ४२८ जाने घर धनीहे सम्मान करले बा । मुख्य सडक विस्तार कैना आपन घर अपनहे भत्कुइया घर धनीहे उपमहानगर सम्मान करल बटैले बा ।
